PDK kundër shtrenjtimit të energjisë elektrike, Shala: Është e papërballueshme, të mos ndodhë

Partia Demokratike e Kosovës ka thënë se është kundër shtrenjtimit të energjisë elektrike, siç është paralajmëruar nga Zyra e Rregullatorit të Energjisë (ZRrE).

Deputeti i kësaj partie, Ferat Shala në seancën e sotme të Kuvendit të Kosovës, ka thënë se shtrenjtimi i energjisë elektrike do të jetë i papërballueshëm për qytetarët.

“Paraqesim shqetësimin tonë për paralajmërimet për ngritjen e çmimit të energjisë nga ZRRE. Jemi në prag të vendimmarrjes nga ZRRE për ngritjen e tarifave për 14%. Ne si PDK jemi kundër dhe kërkojmë që kjo masë të mos ndodh për arsyet si më poshtë: gjendjes jo të mirë ekonomike të vendit shkaku i inflacionit të lartë mbi 14% të gjitha produkteve bazë të jetës, për shkak të rënies së fuqisë punëtore dhe humbjes së shumë vendeve të punës, për shkak të ikjes masive të të gjitha kategorive qytetare jashtë vendit. Kjo rritje është e papërballueshme dhe nuk duhet të ndodh”, ka thënë Shala.

Shala ka shtuar se tash e dy vite jemi në paqartësi rreth të ardhmes së sektorit energjetik të vendit, për shkak të ndërhyrjeve politike në ZRrE, KOSTT e KEK.

“Jemi këtu sepse kemi keqmenaxhim të skajshëm të KEK-ut, si rezultat i zvogëlimit të kapaciteteve prodhuese në Bllokun B2, goditjeve politike ndaj investitorëve në sektorin energjetik të vendit”, tha Shala.

Shala përmendi edhe një takim që kanë mbajtur me përfaqësuesit e ENTSO-E dhe se vërejtjet e tyre ishin shumë të rënda.

“Më 7 mars 2023 komisioni për ekonomi së bashku me dy zyrtarë të KOSTT-it kemi mbajtur takim me përfaqësuesit e ENTSO-E organizatë kjo e operatorëve të transmisionit evropian. Vërejtjet e tyre ishin ekstreme veçanërisht për periudhën e fundit dy vjeçare. Citoj ata për vërejtjet që na dhanë direkt për financat e KOSTT-it, për çmimin e lartë që paguajmë si Kosovë, për penalltitë si rezultat i mos planifikimit. Për shkeljen e marrëveshjes së vitit 2020. Situata që e kemi dëgjuar bashkërisht me kolegët e gjitha subjekteve politike është shqetësuese për shtetin dhe vendin në sektorin energjetik. Citoj “jeni rasti më i keq në tërë sistemin e 39 operatorëve evropian të sistemit të transmisionit nga gjithsejtë 35 vende të BE-së si pjesë e këtyre organizatave”. Jeni rasti më i keq se vet Ukraina që ndodhet në luftë në sistemin energjetik të vendit”, tha Shala.

Deputeti i PDK-së shtoi se nuk ka rast  më të rëndë që përfaqësuesit e ENTSO-E në takim zyrtar na thonë që jeni pikë e zezë në kuadër të Evropës, ndryshoni sepse mund të përjashtoheni.

“Paralajmërimet e tilla duhet të jenë shqetësuese për institucionet. Në emër të emër të grupit të PDK-së ju ofrojmë mbështetje për të dalë nga kjo krizë”, tha Shala. /Telegrafi/