Botë Nga Bota

Moti gjatë dimrit, ‘befasia e pakëndshme’ me të cilën Putini mund të përballet në luftën e tij në Ukrainë

Para 2 vitesh

Disa parashikime rreth motit tregojnë se Evropa mund të përjetojë një dimër të butë.

Dhe kjo, siç vlerëson Newsweek, përcjell Telegrafi, mund të godasë potencialisht planet e presidentit rus Vladimir Putin për të përdorur dimrat e ashpër të Ukrainës në dobi të tij.

Siç kujton mediumi në fjalë, dy javë më parë, një politikan rus sugjeroi në televizionin shtetëror se Kremlini duhet të synojë furnizimin me energji të Ukrainës, duke bërë që civilët të ngrijnë dhe të vdesin nga uria.

Kështu, gjatë gjithë tetorit, Rusia ka shtuar sulmet e saj ndaj infrastrukturës civile, duke synuar rrjetin elektrik dhe duke zhytur pjesë të Ukrainës në errësirë dhe duke lënë disa banorë pa furnizim me ujë.

Megjithatë, me afrimin e dimrit, raportet e reja tregojnë se planet e Rusisë për të përdorur motin e ftohtë në avantazhin e saj mund të mos shkojnë siç është planifikuar.

Javën e kaluar, organizata e lajmeve Visegrad postoi në Twitter se parashikimet e reja nga Qendra e Parashikimeve Numerike të Motit të Institutit të Meteorologjisë dhe Menaxhimit të Ujërave e Polonisë tregojnë se Evropa mund të përjetojë një dimër të butë.

“Kjo neutralizon shumë nga taktikat e luftës hibride të Putinit, duke përfshirë përpjekjet e tij për të përdorur energjinë elektrike si armë dhe për të rritur më tej çmimet”, shkroi Visegrad në Twitter.

Megjithatë, ekspertët paralajmërojnë se dimri do të jetë ende i ftohtë pavarësisht parashikimeve të buta.

Por, temperaturat ka të ngjarë të bëjnë pak për të ndihmuar përpjekjet e Putinit për të dëmtuar moralin ukrainas.

Dani Belo, asistent profesor i marrëdhënieve ndërkombëtare në Universitetin Webster, tha se Rusia po humbet terren në verilindje, lindje dhe disa pjesë të Ukrainës jugore.

Forcat ruse i janë rikthyer përpjekjeve për të thyer moralin e ukrainasve për të pasur sukses në ato territore, por Belo tha se përpjekja nuk ka gjasa të rezultojë e suksesshme pavarësisht nga sulmet e vazhdueshme të Rusisë kundër infrastrukturës kritike.

“A është dëmtimi në infrastrukturën ukrainase mjaftueshëm i rëndësishëm për të krijuar sfida ndaj ngrohjes, furnizimit me ujë dhe elektricitetit? Po”, vlerëson Belo. “Operacioni ajror i Rusisë kundër Ukrainës po vazhdon. Pyetja lind: a do të ketë sukses Rusia të detyrojë Ukrainën të tërhiqet? Përgjigjja është jo, pavarësisht nga ashpërsia e dimrit”.

Ndërsa Matei Georgescu, drejtor në Qendrën Urbane të Kërkimit të Klimës në Universitetin Shtetëror të Arizonës, i tha Newsweek se civilët ukrainas do të vazhdojnë të luftojnë me temperaturat e ftohta.

“Realiteti i situatës është se do të ketë një ulje të sasisë së dritës së diellit. Do të bëhet dukshëm më e ftohtë. Ndoshta nuk do të ketë periudha të gjata moti brutalisht të ftohtë, por kjo nuk ndryshon çdo gjë nga perspektiva civile”, tha Georgescu.

Sipas Newsweek, AccuWeather parashikoi që dimri ukrainas mund të fillojë i butë, por ka të ngjarë të përparojë në temperatura “mjaft tipike”.

Ndryshe, në javët e fundit, Rusia ka rritur sulmet e saj civile në një mënyrë që nuk është parë që nga fillimi i luftës në shkurt.

Të hënën, Rusia lëshoi të paktën 50 raketa që synonin infrastrukturën civile ndërsa sulmet lanë banorët e Kievit pa ujë dhe shumë rajone të Ukrainës pa energji. /Telegrafi/