Ministria e Kulturës, brenda dy javësh do të zhvendoset në Prizren?!

Ministri i Kulturës, Rinisë dhe Sportit, Kujtim Gashi, ka bërë të ditur se një pjesë e stafit të Ministrisë, brenda dy javëve pritet të zhvendoset në objektin e ri të Ministrisë në qytetin e Prizrenit.

“Një pjesë e ministrisë së Kulturës, përkatësisht kabineti i ministrit dhe një pjesë e departamentit të trashëgimisë kulturore dhe departamentit të kulturës do të jenë pjesë e këtij objekti në qytetin e Prizrenit, në mënyrë që të jenë më afër aktiviteteve kulturore dhe gjithsesi pjesës së trashëgimisë kulturore në qytetin e Prizrenit”.

Ai ka thënë se faji i vonesës së kësaj zhvendosjeje është te Komuna e Prizrenit, e cila nuk kishte arritur t’ia dorëzojë me kohë objektin Ministrisë.

“Brenda dy javësh, një pjesë e ministrisë do të bartet në qytetin e Prizrenit, ndërsa pjesa tjetër do të operojë ashtu siç është edhe sot në kryeqytetin e Kosovës, në Prishtinë, në objektin aktual ku edhe sot operojmë”, ka thënë ai. “Do të kemi një ndarje të kabinetit ku një pjesë do të operoj në Prizren dhe një pjesë në Prishtinë në mënyrë që ta mbulojmë gjithë territorin e Kosovës edhe me shërbime, por edhe aktivitetet e nevojshme”. /Ekonomia Online/