Mbahet nën kontroll gjendja me parotit në kryeqytet

Komuna e Prishtinës, pas paraqitjes së disa rasteve me parotit në kryeqytet, thotë se është në përcjellje të gjendjes epidemiologjike të qytetarëve bashkë me Epidemiologun pranë Qendrës Kryesore të Mjekësisë Familjare (QKMF-së) dhe Institutin Kombëtar të shëndetit publik (IKShPK).

“Instituti Kombëtar i Shëndetit Publik ka konstatuar se të dhënat epidemiologjike për rastet e parotitit në Komunën e Prishtinës nuk paraqesin problem, pasi që në bazë të raporteve zyrtare nga janari deri më sot janë lajmëruar 53 raste të parotitit të diagnostikuara vetëm nga aspekti klinik e jo ai laboratorik, me ç’rast vërtetohet vetëm qarkullimi i virusit të egër, i cili është i pranishëm”, thuhet në komunikatë.

Sipas Komunës, kjo situatë vjen si pasojë e ndryshimit të kalendarit të vaksinimit të para disa viteve ku është krijuar një zbrazëtirë në vaksinim ku një pjesë e fëmijëve kanë mbetur pa dozën e dytë të vaksinës mbrojtëse MMR.

“Ekipet e vaksinimit dhe epidemiologeve pranë QKMF-së së bashku me IKSHP, çdo herë kanë qenë të gatshëm dhe gjendja aktuale epidemiologjike është nën mbikëqyrje të plotë dhe vlen të përmendet se kjo gjendje është nga më stabilet në rajon. Komuna e Prishtinës do te vazhdoje me të gjitha kapacitetet qe ka dhe në bashkëpunim me IKSHP ta përcjellë dhe ta mbajë në kontroll këtë situatë dhe për momentin nuk ka nevojë për shqetësim te qytetarët”.