Liqeni i Batllavës po shndërrohet në djerrinë (Foto)

Mungesa e të reshurave atmosferike ka bërë që niveli i ujit në Liqenin e Batllavës të vazhdojë të bie në mënyrë drastike, duke arritur në pikën alarmante.

Rënia e pamëshirshme e nivelit të ujit më liqenin e Batllavës, ka lënë pas vetes sipërfaqe të mëdha djerrinash, ku tashmë janë krijuar shtigje rrugësh dhe kullosa bagëtish.

Në djerrinat e krijuara në shtratin e liqenit në një gjatësi prej afër një kilometri, shihet ndonjë varkë, si një dëshmi që deri para disa muajsh aty kishte ujë.

Banorët përreth liqenit thonë se nuk e mbajnë në mend, asnjëherë të ketë rënë niveli i liqenit, që nga vitet ’60 të shekullit të kaluar, kur u krijua ky liqen artificial.

Rënia e nivelit të ujit në Liqenin e Batllavës, ka bërë që në Prishtinë por edhe në Podujeve dhe vendbanime të tjera që furnizohen me ujë nga ky liqen, të aplikohen reduktime të ashpra të furnizimit me ujë të pijes.

Ndërkohë, kryetari i Komunës së Prishtinës, Shpend Ahmeti, bashkë me drejtuesit e Ujësjellësit Rajonal Prishtina, si alternativë për normalizimin e furnizimit të kryeqytetit me ujë të pijshëm e shohin hapjen e puseve në mes Prishtinës dhe Llukarit, te Fusha e Pajtimit dhe në Parkun e Gërmisë.

Se në çfarë gjendje është niveli i ujit në Liqenin e Batllavës më së miri flasin fotografitë e bëra sot nga fotoreporteri i Telegrafit. /Telegrafi/