Krasniqi: Largimi i Rusisë nga KiE, momentum vendimtar për Kosovën

Kryetari i Partisë Demokratike të Kosovës, Memli Krasniqi pas largimit të Rusisë nga Këshilli i Evropës dje, tha se kjo përbën një mundësi reale për Kosovën.

Përmes një postimi në Facebook, Krasniqi është shprehur se pengesat kryesore që ka pasur Kosova për vite me radhë në tentimin e saj për anëtarësim në këtë organizatë shumë të rëndësishme janë eliminuar me largimin e Rusisë.

“Kjo mundësi e re, ky momentum vendimtar, nuk po shfrytëzohet si duhet nga institucionet e shtetit të Kosovës. Ky rast që i është paraqitur Kosovës, nuk duhet të kaloj pa u kapitalizuar. Institucionet e shtetit duhet të nisin menjëherë dhe pa humbur kohë një fushatë lobimi dhe koordinimi me aleatët tanë strategjik perëndimorë për të planifikuar dhe përcaktuar hapat drejt aplikimit dhe anëtarësimit në Këshillin e Evropës”, ka shkruar Krasniqi, .

Lideri i PDK-së është shprehur se anëtarësimi i Kosovës në KE do të ishte një hap më tej drejt fuqizimit të shtetësisë por edhe fundamental për forcimin e demokracisë, sundimit të ligjit dhe bashkëpunimit në familjen evropiane e më gjerë.

Lexo po ashtu Anëtarësimi i mundshëm i Kosovës në NATO dhe BE – shtohen kërkesat nga miqtë ndërkombëtarë

Ai ka thënë se “qasja në Gjykatën Evropiane të të Drejtave të Njeriut në Strasburg, aty ku zbatohen parimet e drejtësisë së Kartës Evropiane të Drejtave të Njeriut, e cila edhe ashtu është e inkuadruar brenda Kushtetutës së Republikës së Kosovës, do të ishte përfitim i madh për qytetarët dhe shtetin tonë”.

“Prandaj, kjo situatë e re e krijuar, që rritë shanset e Kosovës për pranim në Këshillin e Evropës, duhet të shndërrohet në agjendë me prioritet shtetëror dhe të trajtohet në mënyrë emergjente – duke u ndjekur të gjithë hapat e nevojshëm që mundësojnë anëtarësimin e Kosovës në këtë organizatë ndërkombëtare”.

“Qeveria nuk duhet ta humbas këtë rast. Partia Demokratike e Kosovës, si lidere e Opozitës, është e gatshme që të jap të gjithë kontributin e saj në këtë proces të rëndësisë së madhe për shtetin tonë.”, shkruan Krasniqi. /Telegrafi/