Ja kur do të fillojnë negociatat De Biasi – Kombëtarja e Italisë

Drejtues të Federatës Italiane të Futbollit kanë kontaktuar drejtpërdrejt me trajnerin Gianni De Biasi për një post të mundshëm të tij në bankinën italiane.

Lajmi konfirmohet nga portali i njohur “Calciomercato.it”, përcjellin mediat shqiptare, që citon burime nga federata.

“Në ceremoninë e 7 marsit kur De Biasit iu dorëzua çmimi i ‘Pankinës së Artë’, zyrtarët e federatës patën mundësinë të flisnin me trajnerin. Një takim i parë mes palëve dhe asgjë konkrete, por nevoja për të kuptuar nëse ka vend për negociata”, shkruan portali italian.

Trajneri i Kombëtares shqiptare të futbollit, De Biasi, përmendet në artikull si njëri prej kandidatëve potencial për të marrë drejtimin e bankinës italiane. Edhe pse media të tjera italiane e kanë përmendur De Biasin si njërin prej kandidatëve të mundshëm, “calciomercato.it”, flet për herë të parë për bisedime të këtij lloji.

Më herët, pas paralajmërimit se Konte do të lerë postin e trajnerit të Italisë për të drejtuar skuadrën e Chelseat në Premier Ligë, shumë emra të njohur dolën në skenë.

Mes tyre ishin edhe emrat e Capellos, Ranierit, e Mancinit, por këta të fundit u tërhoqën, ose e bënë të qartë se kanë angazhime të tjera.

Lista u ngushtua shumë dhe ndër emrat që fliten ende (përveç De Biasit), janë: Roberto Donadoni, Francesco Guidolin dhe Gigi Di Biagio.