Inaugurohet shkolla e re në fshatin Haxhaj të Gjilanit

Nxënësit e fshatrave Haxhaj, Selishtë e Demiraj, më nuk do të mësojnë në bodrumin e xhamisë, pasi sot është përuruar objekti i ri i shkollës fillore në fshatin Haxhaj të Gjilanit, i cili është ndërtuar me buxhetin komunal dhe me kosto prej 140 mijë euro.

Në ceremoninë e përurimit ka marrë pjesë kryetari Lutfi Haziri me bashkëpunëtorët, kryetari i Këshillit të Bashkësisë Islame, Naim Aliu, sikurse edhe mësimdhënësit e nxënësit e fshatrave Haxhaj, Selishtë dhe Demiraj.

Haziri, pasi ka uruar nxënësit e mësimdhënësit për hyrjen  në objekt të ri, ka falënderuar kryetarin e KBI’së, Naim Aliu, i cili nuk ka hezituar që ta lëshojë një pjesë të xhamisë për edukimin e nxënësve, në mungesë të objektit të tyre.

“Jam i lumtur që sot po e inaugurojmë objektin e ri të shkollës në Haxhaj, e cila ka qenë jetike për nxënësit e fshatrave Haxhaj, Demiraj e Selishtë. Në mesin e qindra projekteve që kemi realizuar në Grykën e Karadakut, për mua më i rëndësishmi është ky i shkollës. Urime nxënësve dhe mësimdhënësve. E gëzofshi”, ka thënë Haziri.

Kryetari i KBI-së, Naim Aliu, ka deklaruar se ky institucion çdo herë ka qenë i angazhuar për të mirën e qytetarëve.

“Të gjitha xhamitë e Republikës së Kosovës kanë qenë në funksion të institucioneve të Kosovës dhe jam shumë i kënaqur që xhamia në Haxhaj i ka ndihmuar nxënësve të këtyre lokaliteteve që të mos e humbin asnjë ditë mësimin”, ka thënë Aliu.

Drejtori i DKA-së, Nazim Gagica, e falënderoi kryetarin Haziri që arsimin e ka vënë si prioritet të parë të qeverisjes dhe kontributin permanent për të krijuar kushte më të mira për nxënësit.

Drejtori i shkollës në Haxhaj, Rrahman Agushi, e ka falënderuar kryetarin Haziri për mbështetjen që dha në përfundimin e këtij projekti, duke thënë se kjo shkollë e ka munguar kësaj treve që një kohë të gjatë.

Kryetari i Këshillit të fshatit Haxhaj, Metush Dauti, ka thënë se kjo është ditë historike për ta, pasi me dekada e kanë pritur këtë objekt.

Kjo shkollë sot numëron 83 nxënës.​