De Biasi: Nuk ka bisedime me Italinë

Zërat për interesimin e kombëtares italiane për Gianni de Biasin kanë marrë përmasat të mëdha, duke u rritur nga dita në ditë, aq sa kanë nisur të bezdisin federatën shqiptare, por edhe vetë trajnerin kuqezi.

Dje De Biazs u shpreh se do ishte i lumtur të punonte me kombëtaren italiane dhe ndarja me Shqipërinë mund të bëhet në mënyrë miqësore pas Evropianit, por reagimi jo fort miqësor i presidentit Armand Duka (Italia duhet të respektojë rregullat, kontrata prishet me dëmshpërblim) ka bërë që De Biasi të ndryshojë paksa qëndrim, duke folur për Panorama-Sport.

“Nuk kam pasur asnjë kontakt me federatën italiane, gjithçka është spekulim mediatik”, thotë De Biasi, i cili e ka me mediat.

“Ju gazetarët keni ndërtuar gjithçka duke mbledhur copëza andej-këtej, duke aluduar pa fund. Lexoj shumë gjëra të pavërteta, si për bisedime inekzistente me Italinë, apo që jam në krye të ndonjë liste. Çdo javë mediat nxjerrin një emër të ri dhe nuk ka asgjë reale nga ato që shkruhen”.

“Kemi arritur një objektiv madhor, por unë nuk kënaqem me kaq. Jam shumë i motivuar dhe kërkoj sukses në Evropian, nuk shkoj për turizëm dhe nuk mendoj për asgjë tjetër. Nuk komentoj deklaratat e askujt, aq më shumë të presidentit Duka”.