Çfarë do të thotë për Kinën, shtytja e Trumpit për paqe në Ukrainë?

Nga: Simone McCarthy / CNN
Përkthimi: Telegrafi.com

Po fillon të marrë formë qartësia rreth planeve të presidentit të ShBA-së, Donald Trump, për t’i dhënë fund luftës së Rusisë në Ukrainë, me administratën e tij që duket se po pranon disa nga kërkesat kryesore të Kremlinit, duke përfshirë që Ukraina të mos anëtarësohet në NATO dhe të mos kthehet në kufijtë e saj sovranë të para vitit 2014.

Në mes të kaosit që duket se po krijon ndryshimi i pozicionit të mëparshëm të ShBA-së mbi paqen, një tjetër përparësi e administratës po del në pah: zhvendosja e vëmendjes nga Evropa drejt Kinës.

Duke folur në një takim në Bruksel, të mërkurën, sekretari i Mbrojtjes i ShBA-së, Pete Hegseth, tha se “realitetet e zymta strategjike pengojnë Shtetet e Bashkuara të përqendrohen kryesisht në sigurinë e Evropës”.

Një nga fushat kryesore të fokusit të ShBA-së, sipas tij, duhet të ishte siguria kufitare, ndërsa një tjetër ishte Pekini.

“Ne gjithashtu po përballemi me një rival te komunistët kinezë, të cilët kanë aftësinë dhe synimin për të kërcënuar atdheun tonë dhe interesat tona thelbësore kombëtare në Indo-Paqësor”, tha Hegseth. “ShBA-ja po e vendos si prioritet parandalimin e luftës me Kinën në Paqësor”.

Pekini, pa dyshim, po e ndjek nga afër këtë deklaratë të Hegsethit, e cila vjen në një moment kur ShBA-ja ka intensifikuar konkurrencën e saj ekonomike me Kinën, duke vendosur në fillim të këtij muaji një tarifë prej 10 për qind mbi të gjitha importet kineze, me mundësinë e vendosjes së tarifave të tjera shtesë.

Kina e ka mirëpritur atë që ka qenë një fillim më i ngrohtë – nga sa pritej – i mandatit të dytë të administratës Trump, me liderin amerikan që ka shprehur vazhdimisht pikëpamje pozitive për presidentin kinez Xi Jinping dhe potencialin për bashkëpunim midis dy vendeve.

Zyrtarët në Pekin gjithashtu ka të ngjarë të kenë shpresuar që ndryshimi i politikës së jashtme të ShBA-së, nën Trumpin, do të dobësonte aleancat amerikane në Azi. Kina është irrituar nga forcimi i marrëdhënieve midis ShBA-së dhe partnerëve si Japonia, Koreja e Jugut dhe Filipinet gjatë administratës së ish-presidentit Joe Biden.

Tani është e qartë se ata do ta ndjekin me vëmendje mënyrën se si ShBA-ja mund të rregullojë qëndrimin dhe fokusin e saj në rajonin ku Pekini shpreson të zgjerojë ndikimin dhe të forcojë pretendimet mbi Detin e Kinës Jugore dhe mbi demokracinë vetëqeverisëse të Tajvanit.

Ata ka të ngjarë të kenë edhe një shqetësim tjetër urgjent: nëse afrimi i Trumpit me presidentin rus Vladimir Putin do ta tërheqë Moskën – një aleat i rëndësishëm për liderin kinez në rivalitetin e tij me Perëndimin – larg Pekinit dhe më pranë Uashingtonit.

Xi dhe Putini shpallën me bujë partneritetin “pa kufij”, vetëm disa ditë para se tanket ruse të kalonin kufirin drejt Ukrainës. Të dy e kanë forcuar më tej bashkëpunimin gjatë luftës, me Kinën që është shfaqur si një shpëtim ekonomik për Rusinë, përfshirë furnizimin me mallra me përdorim të dyfishtë, të cilat liderët e NATO-s thanë se po fuqizojnë kompleksin industrial të mbrojtjes së Rusisë. Pekini e ka mbrojtur këtë qëndrim si tregti normale.

Marrëdhënia midis tyre është ndërtuar prej kohësh mbi përbuzjen e përbashkët për NATO-n dhe aleancat e ShBA-së në përgjithësi. Putini dhe Xi kanë punuar së bashku për të krijuar blloqe joperëndimore ndërkombëtare, ndërkohë që kanë intensifikuar stërvitjet e përbashkëta ushtarake dhe kanë mbështetur njëri-tjetrin në forumet si Kombet e Bashkuara.

Kjo do të thotë se një ngrohje e marrëdhënieve midis Putinit dhe Uashingtonit mund të ketë një ndikim të gjerë mbi aftësinë e Kinës për të kundërshtuar presionin nga ShBA-ja dhe për të avancuar vizionin e Xisë për një rend botëror alternativ, të pavarur nga ndikimi amerikan.

Ndërkohë, vëzhguesit thonë se Pekini mund të jetë gjithashtu duke ndjekur nga afër mënyrën se si ShBA-ja dhe komuniteti ndërkombëtar do të menaxhojnë një zgjidhje të mundshme të konfliktit në Ukrainë, duke pasur parasysh ambiciet e veta për Tajvanin.

Partia Komuniste e Kinës pretendon ishullin si pjesë të territorit të saj, pavarësisht se nuk e ka qeverisur kurrë, dhe Xi është zotuar ta marrë atë nën kontroll – me forcë nëse është e nevojshme.

Duke folur për Kaitlan Collinsin e CNN-it, të mërkurën, ish-këshilltari i sigurisë kombëtare të Trumpit, John Bolton, ka thënë se Pekini tani e sheh ShBA-në si një fuqi që “nuk është e gatshme të veprojë kundër një agresioni të paprovokuar në qendër të Evropës”.

“Çfarë po mendojnë tani për Tajvanin”? – tha Bolton. /Telegrafi/