Bislimi në Hagë: BE-ja është destinacioni, fati e vizioni ynë

Gjatë qëndrimit në Holandë, zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, ka zhvilluar një bisedë me studentë të marrëdhënieve ndërkombëtare në Universitetin Leiden në Hagë dhe diplomatë të rinj.

Në fjalën e tij, Bislimi ka folur mbi zhvillimin e Kosovës dhe progresin socio-ekonomik që ka njohur vendi.

“Përtej barrierave me të cilat vendi është përballur, Kosova ka treguar potencialin e saj për zhvillim. Vëmendje të veçantë ka patur në rritjen e qëndrueshme dhe shpërndarjen e drejtë e të barabartë tek qytetarët. Zhvillimi i Kosovës u reflektua dhe në renditjet e indekseve ndërkombëtare”, ka thënë ai.

Sa i përket integrimit evropian, zëvendëskryeministri ka folur mbi mbështetjen e gjerë të qytetarëve ndaj anëtarësimit në familjen evropiane.

Ai ka theksuar se me rëndësi është fuqizimi i mesazhit se Kosova, përmes dhe institucioneve të saj të maturuara e të përgatitura, është e gatshme të bëjë hapa tutje në këtë proces.

“Bashkimi Evropian është vizioni, fati e destinacioni ynë”, është shprehur Bislimi.

Ai tutje ka thënë se sinjali që japin dhe raportet e përpiluara për Kosovën siç është vetë ai i Komisionit Evropian, mund të përdoret si kriter matës për të treguar se Kosova e meriton statusin e vendit kandidat.

“Zëvendëskryeministri Bislimi foli dhe mbi prapavijën e procesit të dialogut me Serbinë dhe Marrëveshjen Bazike të arritur këtë vit. Ai tha se marrëveshja duhet të zbatohet në plotni, pa vonesa dhe pa kushtëzime, përmes një plani të sekuencimit të drejtë, të balancuar e gjithëpërfshirës. Në përfundim, ai i falënderoi studentët dhe Universitetin Leiden për mundësinë dhe bashkëbisedimin e frytshëm të zhvilluar”, thuhet në komunikatën për media të Zyrës së Kryeministrit. /Telegrafi/