Bislimi: Faktet treguan që Vuçiqi dhe Radoiçiqi qëndrojnë pas sulmit në Banjskë

Zëvendëskryeministri i Kosovës, Besnik Bislimi ka thënë se akti terrorist në Banjskë të Zveçanit, rezultoi i pasuksesshëm.

“Akti i agresionit në Banjskë ka ngritur vëmendjen si në Kosovë ashtu edhe tek vendet ndërkombëtare. Raportet mes Kosovës dhe Serbisë pas 11 vitesh dialog nuk kanë përparuar, por kemi një ftohje të theksuar”, tha Bislimi.

Zëvendëskryeministri shtoi se që nga paslufta në Kosovë, presidenti serb Aleksandar Vuçiq ka shfrytëzuar situatën e brishtë në veri të Kosovës.

“Vuçiq ka konsoliduar grupe kriminale në të dy anët e kufirit në krye të së cilëve qëndron Radoiçiqi dhe Veselenoviqi. Madje, falë këtyre grupeve kriminale ata siç duket kanë përfituar shifra shumë milionëshe duke përdorur veriun për trafikim droge, dhe ne kemi raste ku kemi gjetur laboratorët e drogës si rezultat i operacioneve të suksesshme të Policisë së Kosovës”, ka thënë Bislimi.

Ai shtoi se veprimet e këtij grupi kriminal kanë qenë jashtëzakonisht agresive.

“Ata në vazhdimësi kanë plagosur dhe vrarë zyrtarë policorë vendorë e ndërkombëtarë. Vuçiq ka glorifikuar veprimet e tyre si veprime atdhetare… ai shkon më tej dhe kërcënon serbët e Kosovës. Për ne si qeveri është e rëndësishme tu themi qytetarëve serbë se kjo nuk është e vërtetë, dhe se interesimi i vetëm i qeverisë është integrimi i tyre”, ka thënë Bislimi.

Ai ka shtuar se faktet për sulmin në Banjskë janë të pamohueshme.

“U pa se Vuçiqi dhe Radoiçiqi ishin pas këtij agresioni. Ne thërrasim Serbinë që të heq dorë, por duhet të jemi të përgatitur se Serbia nuk do ta bëjë këtë dhe duhet të dimë se ky nuk është akti i parë i tillë, e nuk do të jetë as i fundit”, tha Bislimi. /Telegrafi/