Asamblisti i LDK-së e quan të gabuar koalicionin VV –AAK në Prishtinë

Asamblisti i Lidhjes Demokratike të Kosovës në Kuvendin Komunal të Prishtinës, Flamur Shala, po e quan të gabuar koalicionin ndërmjet Vetëvendosjes dhe AAK-së në Komunën e Prishtinës.

Në një postim në Facebook, Shala ndonëse e quan të drejtë të Vetëvendosjes që të lidh koalicion me subjekte tjera mbi bazën e një marrëveshje dhe e drejtë e cilitdo subjekt, por sipas tij, ky koalicion në komunë të Prishtinës nuk përbën shumicën në një qeverisje.

“Është e drejtë e VV dhe z. Shpend Ahmeti që të bëjë koalicion me subjekte të tjera mbi bazën e një marrëveshjeje. Dhe është e drejtë e cilitdo subjekt për t’u bërë pjesë e një marrëveshjeje të tillë koalicioni.

Një gjë dihet se koalicioni që nuk përbën shumicën në një qeverisje, është koalicion për ndarjen e përgjegjësisë, jo për suksese, por për dështimet e asaj udhëheqjeje. Bazuar në këtë formulë, u duk shumë e zbehtë dhe joserioze marrëveshja për “ndarjen e përgjegjësive” e VV dhe AAK, që nënkupton “koalicion” pa numra dhe i dështimit, po tani jo me 10, por me 14 anëtarë të Kuvendit.

Një koncept i tillë për qeverisje është i gabuar!”, thekson Shala. /Telegrafi/