Anëtarë të Kongresit bëjnë thirrje për rritjen e angazhimit amerikan në Ballkan, përmendin dialogun Kosovë-Serbi

Anëtarët e Kongresit amerikan, 19 sish, thonë se në kushtet e krijuara nga agresioni rus në Ukrainë, është më e rëndësishme se kurrë që administrata e Presidentit Joe Biden të rrisë angazhimin diplomatik në Ballkanin Perëndimor.

Ligjvënësit amerikanë nga të dyja partitë, në një letër dërguar Sekretarit amerikan të Shtetit Antony Blinken, thonë se Shtetet e Bashkuara duhet të dyfishojnë përpjekjet për konsolidimin e demokracisë dhe për nxitjen e integrimit euro-atlantik të rajonit.

“Integrimi i plotë i Ballkanit Perëndimor në komunitetin transatlantik duhet të jetë përparësi për Shtetet e Bashkuara ndërsa ne përpiqemi të konsolidojnë aleancat tona në gjithë Evropën dhe i kundërvihemi përhapjes dhe ndikimit të regjimeve autokratike, përfshirë atyre të Rusisë dhe Kinës”, thuhet në letër.

Letrën e ka bërë publike kongresistja Dina Titus, e cila në një postim në Facebook ka shkruar se “Ndërsa bota shikon shpalosjen e pushtimit të paligjshëm rus të Ukrainës, është më e rëndësishme se kurrë për SHBA-në të thellojë angazhimin e saj në Ballkan.”

“Sot unë drejtova një letër me kolegët e mi duke i kërkuar Departamentit të Shtetit për të demonstruar gatishmërinë tonë për të mbështetur vlerat demokratike jashtë vendit”, ka shkruar ajo.

As the world watches Russia’s unlawful invasion of Ukraine unfold, it is more important than ever for the U.S. to deepen its engagement in the Balkans. Today I led a letter with my colleagues urging @StateDept to demonstrate our readiness to support democratic values abroad. pic.twitter.com/c0FVz7iEYI

— Dina Titus (@repdinatitus) March 4, 2022

Në letër anëtarët e Kongresit thonë se përpjekjet amerikane duhet të përqendrohen tek rritja e investimeve dhe integrimi i rajonit, angazhimi për integrim të shpejtë në BE, nxitja a dialogut Kosovë-Serbi, zbutja e tensioneve në Bosnje dhe ndihma për demokracinë.

Ndërkohë një nga nënshkruesit e letrës, ligjvënësi nga Nju Jorku Ritchie Torres, ka kërkuar që NATO-ja të anëtarësojë Kosovën në aleancë.

Në një postim në Twitter ai shkruan se “Shtetet e Bashkuara “nuk kanë aleat më të madh se Kosovën në Evropën Juglindore “. /VoA/