Tahiri: AAK do të fillojë procedurat parlamentare për inicimin e amnistisë fiskale
Shefi i Grupit Parlamentar të Aleancës për Ardhmërinë e Kosovës, Besnik Tahiri, ka thënë se do të fillojnë procedurat parlamentare për inicimin e amnistisë fiskale, si formë ndihmese ndaj bizneseve të prekura nga situata me Covid-19.
Tahiri ka thënë se me amnistinë fiskale do t'u lehtësohet puna bizneseve që janë prekur nga COVID-19.
“Me amnistinë fiskale do të tentojmë që bizneseve të cilat kanë pësuar nga situata me pandemi, të iu lehtësohet operimi ekonomik, në mënyrë që të mos rrezikohet funksionimi i mëtejmë i tyre, i cili do rezultonte në thellimin e krizës ekonomike dhe humbjen e vendeve të punës”, ka thënë ai.
Shefi i GP të AAK-së, thotë se kjo iniciative ka qenë premtim i ish deputetit, Daut Haradinaj.
“Njëherë, inicimi i këtyre masave lehtësuese për bizneset, ka qenë premtim i ish-deputetit Daut Haradinaj gjatë fushatës për zgjedhjet parlamentare të 14 shkurtit’, shtoi më tej Tahiri. /Telegrafi/