Kuadratet po bëhen sërish të parezistueshme: Ja si t’i kombinoni që të duken moderne dhe elegante

Nga fundet e lehta te këmishët e veshura si xhaketë, kombinimet që po shohim në Instagram tregojnë se motivi me kuadrate ka lënë pas pamjen “shkollore” dhe po hyn në një fazë shumë më interesante

Çdo sezon mode sjell një ngjyrë, motiv apo siluetë që papritur fillojmë ta shohim kudo. Mjafton një shëtitje nëpër dyqane ose disa minuta në rrjetet sociale për ta kuptuar se cilat tendenca do të dominojnë muajt në vazhdim.

Këtë verë vëmendjen e mori e kuqja, ndërsa tani, me afrimin e periudhës kalimtare, ngjyrat nuk po largohen aspak nga skena. Përkundrazi, detajet shumëngjyrëshe po bëhen një mënyrë e thjeshtë për ta thyer minimalizmin dhe për t’i dhënë veshjes më shumë karakter.

Por një tjetër motiv po tërheq gjithnjë e më shumë vëmendje: kuadratet.

Pas një periudhe kur qëndruan disi në hije, ato po shfaqen sërish në koleksionet aktuale dhe në kombinimet e vajzave me stil që ndjekim në Instagram. Këtë herë duken më moderne, më të sofistikuara dhe shumë më të lehta për t’u kombinuar, transmeton Telegrafi.

Kuadratet nuk kanë më rregulla

Moda aktuale është në një fazë ku pothuajse gjithçka lejohet. Në të njëjtën kohë shohim pika, vija, motive kafshësh dhe versione të ndryshme të kuadrateve.

Rëndësi nuk ka më vetëm çfarë është “in”, por si e përshtatim një pjesë me stilin tonë personal.

Kuadratet janë veçanërisht të përshtatshme për fundin e verës dhe fillimin e vjeshtës, sepse ruajnë një dozë lozonjarie, ndërsa ngjyrat mund të përshtaten lehtësisht me sezonin më të freskët.

Dhe, më e rëndësishmja, nuk kanë pse të duken më të rënda, tepër serioze apo si uniformë shkolle.

Versioni i ri i stilit “school chic”

Fundet e lirshme me kuadrate janë ndër pjesët që mund të kalojnë shumë lehtë nga një veshje e përditshme në një kombinim për punë.

Mënyra më e sigurt është të zgjidhni një nga ngjyrat që gjendet në motiv dhe ta përsërisni në pjesën tjetër të veshjes. Kjo e bën kombinimin menjëherë më harmonik.

Por kontrastet mund të jenë edhe më interesante.

Një fund me kuadrate mund të kombinohet me një bluzë lëkure, një top transparent ose një T-shirt të thjeshtë në një ngjyrë të fortë. Rezultati duket i menduar dhe modern, edhe pse kombinimi është shumë i thjeshtë.

Ndërsa për ato që preferojnë elegancën klasike, këmisha e bardhë mbetet zgjedhje e pagabueshme.

Këmisha me kuadrate, por jo si dikur

Shumë prej nesh i kujtojnë këmishët me kuadrate të veshura të hapura mbi një T-shirt, një stil që para rreth një dekade lidhej fort me estetikën grunge dhe filmat e serialet e viteve ’90.

Sot ato janë kthyer në një version shumë më të rafinuar.

Këmisha me kuadrate vishet gjithnjë e më shpesh si një xhaketë e lehtë, mbi një bazë të thjeshtë. Mund të kombinohet me xhinse apo pantallona me prerje “barrel” për një pamje më casual, por funksionon po aq mirë edhe me pjesë më elegante.

Një nga kombinimet më interesante është ai me fund slip dhe top të thjeshtë, ndërsa këmisha me kuadrate vishet sipër si shtresa e fundit.

Rezultati është i relaksuar, por njëkohësisht i kuruar – pikërisht ajo lloj elegance që duket sikur nuk është menduar gjatë.

Nëse deri tani kuadratet ju janë dukur tepër klasike apo “shkollore”, ky sezon mund t’ju bëjë t’i shihni me sy krejt tjetër.

/Telegrafi/