Aktori dhe producenti, Justin Baldoni, ka përforcuar ekipin e tij ligjor duke punësuar avokaten e njohur Alexandra Shapiro, e cila më parë ka përfaqësuar emra si Sean "Diddy" Combs dhe Sam Bankman-Fried.
Ky zhvillim vjen në mes të betejës së tij ligjore me aktoren Blake Lively, lidhur me ngjarjet gjatë xhirimeve të filmit "It Ends with Us" në vitin 2024.
Sipas dokumenteve gjyqësore të paraqitura më 15 shtator, Shapiro është shtuar zyrtarisht në ekipin ligjor të Baldonit dhe kompanisë së tij Wayfarer Studios, shkruan DailyMail.
Ky hap vjen ndërkohë që një akuzues i dytë ka dalë në skenë, duke pretenduar se ka përjetuar “ndërveprime të përsëritura negative” me Baldonin dhe bashkëpunëtorët e tij, përfshirë “abuzim verbal”.
Personi në fjalë, identiteti i të cilit nuk është bërë publik, pretendon gjithashtu se Baldonit iu ndalua hyrja në sheshin e xhirimeve në një projekt tjetër të mëparshëm, dhe se kishte kërkuar përjashtimin e tij nga aktivitetet e marketingut dhe marrëdhënieve me publikun.
Ndërkohë, Blake Lively ka paraqitur një mocion të ri në gjykatë, duke kërkuar dëmshpërblim të trefishtë, tarifat e avokatëve dhe dëmshpërblim ndëshkues ndaj kompanisë së Baldonit.
Ajo argumenton se padia për shpifje ndaj saj ishte një reagim hakmarrës pas raportimeve të saj për ngacmim dhe se kompania po përpiqet të mbulojë sjelljet e saj të paligjshme përmes sulmeve personale.
Avokatët e Lively kërkojnë që gjykata ta njohë atë si “të paditurën mbizotëruese” dhe t’i japë të drejtën për kompensim të plotë.
Për momentin, përfaqësuesit e Baldonit nuk kanë dhënë komente mbi zhvillimet e fundit. /Telegrafi/