Jakshiq: Rusia e BE-ja i kthejnë shpinën Serbisë, Vuçiq po mundohet ta blejë mbështetjen e SHBA-së për Kosovën

Tre nga katër “karriget” e diplomacisë serbe janë dobësuar seriozisht – marrëdhëniet me Uashingtonin, Brukselin dhe Moskën – vlerëson analisti i politikës së jashtme, Boshko Jakshiq.

Ai përjashton Kinën, e cila sipas tij është e interesuar vetëm për investime dhe fitime.

Sipas Jakshiqit, dorëzimi i ndërtesës së Shtabit të Përgjithshëm nuk do të përmirësojë raportet mes Serbisë dhe Shteteve të Bashkuara.

“Në fillim të këtij viti kishte shenja për përmirësim të marrëdhënieve me amerikanët. Madje u përmend mundësia e një dialogu strategjik mes dy vendeve. Por pas dështimit të Vuçiqit për të marrë pjesë në konventën republikane në maj, raportet nisën të përkeqësohen”, tha Jakshiq.

Ai shtoi se kjo përpjekje për t’ua dorëzuar Shtabin e Përgjithshëm amerikanëve i ngjan shitjes së kompanisë NIS rusëve, si tentativë për të fituar simpati politike.

Sipas tij, ndërtimi i një “Kulle Trump” në tokën evropiane mund të ketë vetëm rëndësi simbolike, por nuk do të ndryshojë asgjë në aspektin politik.

Donald Trump është i interesuar ta shkëpusë Serbinë nga ndikimi energjetik rus, ndërkaq përpjekja e Vuçiqit për të lajkatuar SHBA-në ngjan me marrëveshjen e dikurshme me Rusinë për Kosovën.

"Mendoj se Vuçiq ka një pakënaqësi të fortë ndaj Trump. Që atëherë, marrëdhëniet me amerikanët kanë qenë në një spirale në rënie. Kjo me Shtabin e Përgjithshëm është një përpjekje për të korrigjuar disi ato gabime në një mënyrë që më kujton shitjen e NIS -it rusëve , me qëllim që t'i lajkatoj ata për mbështetjen e tyre për Kosovën. Më duket se nuk ka asgjë të keqe në këtë, dhe ne mund ta shohim këtë nga intransigjenca e Amerikës në lidhje me NIS-in ", tha ai.

Analisti serb vlerëson se diplomacia e Beogradit po përsërit gabime të vjetra.

“Pas luftës në Ukrainë, Serbia qëndroi neutrale për muaj të tërë. Tani, kur i duhet të bisedojë me Moskën për NIS-in, dërgon kryetaren e Kuvendit në Kiev. Pas kësaj, Vuçiq nuk do të pranohet më në Moskë”, shtoi ai.

Jakshiq kujtoi edhe reagimin e ashpër të zëdhënëses ruse Maria Zakharova pas shitjes së municioneve Ukrainës dhe Izraelit, duke thënë se përfitimi financiar nuk duhet të jetë prioritet ndaj dimensioneve politike.

Ai theksoi se Serbia tashmë ka marrëdhënie të dëmtuara me tre qendra të mëdha – SHBA-në, BE-në dhe Rusinë – ndërsa Kina mbetet e vetmja që ruan interesin ekonomik.

Sa i përket takimit të Aleksandar Vuçiq me Emmanuel Macronin, Jakshiq u shpreh skeptik për ndonjë përparim.

“Macron as nuk ka autoritet e as ambicie për të përmirësuar marrëdhëniet e Serbisë me BE-në. Gjermanët po tërhiqen nga interesi për Serbinë pas heqjes dorë nga projekti i litiumit”, tha ai.

Sipas tij, ambiciet politike të Vuçiqit janë shumë më të mëdha se mundësitë e tij reale.

“Ai dëshironte të ishte Viktor Orbani i ri – i mirë me Putinin dhe Trumpin – por nuk e mësoi as këtë mësim. Nuk është i pjekur për lojëra të mëdha gjeopolitike dhe për këtë po paguajmë çmimin”, u shpreh Jakshq.

Në fund, ai theksoi se çështja më e rëndësishme për momentin mbetet problemi me naftën.

“Rafineria e Pançevës mund të ndalojë prodhimin më 25 nëntor. Ky është problemi më urgjent që Serbia duhet ta zgjidhë”, përfundoi Jakshiq, raporton N1, transmeton Telegrafi.