Romelu Lukaku ka bërë të ditur se do t'i pëlqente bashkëpunimi me Antonio Conten te Interi dhe madje e ka quajtur italianin "trajneri më i mirë në botë".
Sulmuesi belg është pjesë e Manchester Unitedit në dy sezonet e fundit që prej transferimit nga Evertoni me kërkesë të Jose Mourinhos në verën e vitit 2017.
Megjithatë, ai ka dështuar të bëjë emër në Old Trafford, përkundër se i ka shënuar 42 gola në 96 paraqitje me Djajtë e Kuq.
Unitedi dëshiron ta ristrukturojë skuadrën, ndërsa Lukaku është në mesin e atyre që mund të largohen, teksa Interi ka dalë si opsion për të qenë destinacioni i tij i ardhshëm.
"Conte ka shkuar te Interi, për mua ai është trajneri më i mirë në botë", është shprehur Lukaku për Sportmediaset.
"Sa i përket të ardhmes time, unë e kam marrë një vendim që nuk mund ta tregoj publikisht për shkak të respektit për Manchester Unitedin, me të cilin kam akoma kontratë", ka shtuar ai. /Telegrafi/