Të dielën publikohet dokumentari i Rita Orës dhe UNICEF-it, i realizuar në Kosovë

Rita Ora ka folur për vizitën e saj emocionale dhe ‘të veçantë’ në Kosovën e saj amtare , si pjesë e punës së saj si ambasadore e UNICEF-it në Mbretërinë e Bashkuar.

Këngëtarja 28 vjeçare, e cila u largua nga vendi si fëmijë kur familja e saj u detyrua të largohej nga konflikti serbo-shqiptar, tha se udhëtoi për në vendlindjen e saj për të takuar të rinjtë që kishin nevojë për ndihmë, shkruan DailyMail, transmeton Telegrafi.

Rita tha: “Takimi i fëmijëve dhe familjeve në vendin ku kam lindur ishte kaq i veçantë dhe duke parë punën që UNICEF bën për t’i mbështetur ata, më ka bërë më të vendosur se kurrë për të shfrytëzuar pozicionin tim për të mbështetur dhe për të bërë fushatë”.

“Familja ime u largua nga Kosova për shkak të konflikteve në kërkim të sigurisë dhe mundësive më të mira për të ardhmen. Sot është e mahnitshme të shohësh se Kosova është në paqe dhe fëmijët kanë qasje shumë më të mirë në kujdesin shëndetësor dhe arsim cilësor”, ka thënë më tej këngëtarja shqiptare.

Udhëtimi emocional i saj me familjet do të dokumentohet në një film që do të transmetohet në “Soccer Aid” për UNICEF në ITV këtë të diel.

Dokumentari do të tregojë se si fushata e bamirësisë ka përmirësuar shëndetin dhe edukimin e fëmijëve.

Rita kaloi kohë duke takuar të rinjtë dhe familjet e tyre, duke përfshirë një adoleshente, babai i së cilës vdiq kur ishte fëmijë, përpara se nëna e saj të diagnostikohej me kancer.

Rita tha: “Kam pasur nderin të vizitoj 19-vjeçaren Antigona që jeton në një zonë rurale jashtë kryeqytetit, Prishtinë”.

Babai i saj vdiq kur ishte shumë e re dhe pastaj nëna e saj u diagnostifikua me kancer, kështu që ajo duhej të braktiste shkollën për t’u kujdesur për vëllezërit e motrat e saj.

“Antigona u martua në moshën 16 vjeçare dhe tani ka dy vajza, të cilat ajo dëshiron t’u japë mundësitë që ajo kurrë nuk i kishte”, thotë Rita Ora.

Ylli me prejardhje shqiptare , e cila është ambasadore bamirëse, do të performojë gjysmë ore gjatë eventit në “Soccer Aid for Unicef”, duke zbuluar se udhëtimi në vendin e saj të lindjes ishte ‘i pabesueshëm’.

Ajo tha: “E kam parë të gjithë punën e UNICEF dhe njerëz si Infermierja Kefsere kanë bërë në Kosovë, vendin nga ku unë vi, dhe kjo do të thotë kaq shumë për mua. Të jesh atje dhe të shohësh të gjitha gjërat e bëra është vërtet e pabesueshme”.

Rita, e cila ka qenë një ambasadore e UNICEF-it që nga viti 2013, po vazhdon të shijojë suksesin e albumit të saj më të fundit, “Phoenix”. /Telegrafi/