Situata me pandeminë ndikoi edhe në aspektin psikologjik te qytetarët e Kosovës

Ankthi e stresi kanë qenë dy nga problemet të cilat i kanë pasur qytetarët e Kosovës, të cilët kanë kërkuar ndihmë në Linjën për Ndihmë Psikologjike për COVID-19, e cila është hapur dhe operon tash e një muaj në Ministrinë e Shëndetësisë.

Njëra nga koordinatoret e Linjës për Ndihmë Psikologjike, Gresa Selmani, gjatë intervistës për Telegrafin ka thënë se këtë linja është funksionalizu si rezultat i bashkëpunimit të departamentit të Psikologjisë të Universitetit të Prishtinës në bashkëpunim me Ministrinë e Shëndetësisë, ku të gjithë vulletarët e angazhuar në Linjë janë psikologë të diplomuar në studimet e nivelit master, ose bachelor dhe absolventë të psikologjisë.

“Linja jonë nuk merret me diagnoza ose përshkrimin e medikamenteve ose me diagnoza, por është ndihmë e parë psikologjike që i ndihmon qytetarët të tejkalojnë problemet e tyre”, shpjegon Selmani.

Ajo tha po ashtu se deri më tani janë regjistruar deri në 1 mijë e 110 thirrje në të cilat janë dhënë mijëra këshilla të ndryshme, gjithmonë duke e pasur për qëllim ndihmën që qytetarët ta tejkalojnë më së miri kalimin e kësaj periudhe me anë të ushtrimeve e teknikave të ndryshme.

Ndërkaq, psikologu klinik, Visar Sadiku ka thënë për Telegrafin se gjatë periudhës së pandemisë ka vërejtur një numër më të madh të pacientëve, të cilët kanë kërkuar ndihmë.

Sadiku tha se shqetësimet e tyre kanë qenë nga më të ndryshmet, por kryesisht ka pasur nga ata të cilët kishin probleme dhe nevojë për ndihmë edhe më herët.

“ankesat më të shpeshta kanë qenë problemet që kanë të bëjnë me mendimet për shqetësime që kanë të bëjnë me shëndetin, që ndryshe i referohemi si ankthi shëndetësor. Ankthi shëndetësor ka qenë ankesa më e shpeshtë që e kemi prnuar edhe në formë të shkruar edhe në formë të thirrjeve telefonike. Problemet më të mëdha kanë hasur kategoria e cila ka pasur paraprakisht probleme psikologjike”, tha Sadiku për Telegrafin.

Lexo po ashtu Qindra telefonata për ndihmë psikologjike gjatë pandemisë në Kosovë

Sipas Sadikut, qytetarëve do tu duhet një kohë e caktuar për tu riintegruar, kurse shtoi se personat që më së shumti mund të hasin në probleme janë ata të cilët stigmatizohen për shkak se kanë qenë të infektuar me COVID-19. /Telegrafi/