Planet e Low për Mustafin

Qendërmbrojtësi shqiptar, Shkodran Mustafi, do të vazhdojë të jetë titullar edhe në ndeshjet tjera të përfaqësueses së Gjermanisë.

Mediay gjermane kanë raportuar se ai do të jetë titullar edhe në ndeshjen e ardhshme, të cilën Gjermania e luan kundër Polonisë.

Futbollisti i Valencias vendin e titullarit e ka siguruar pas paraqitjes së mirë në ndeshjen e parë kundër Ukrainës. Madje, në këtë ndeshje, ai shënoi golin e parë për Gjermaninë. Për Mustafin ky ishte goli i parë me fanellën e Gjermanisë në paraqitjen e 11-të me të.

Në ndeshjen kundër Ukrainës, ai u aktivizua si titullar për shkak të lëndimit të Mats Hummelsit, i cili pritet të aktivizohet ndaj Polonisë, përcjell Koha Ditore. Por, me gjithë aktivizimin e Hummelsit, Mustafit do t’i bëhet vendi përkrah tij në qendër të mbrojtjes, pasi seleksionuesi Joachim Low do ta zhvendosë Jerome Boatengun në krahun e djathtë të mbrojtjes, duke lënën jashtë ekipit Benedikt Howedesin.

Krahas stabilitetit në mbrojtje, Loew e do Mustafin në përbërjen e parë për shkak të aftësisë së tij për të shënuar gol me kokë. Gjatë fazës përgatitore të Gjermanisë për “Euro 2016”, Mustafi ishte më i miri në ajër nga goditjet prej këndit dhe gjuajtjeve të lira.