Përplasjet mes pozitës dhe opozitës bllokojnë rizgjedhjen e anëtarëve të antikorrupsionit

Pothuajse dy muaj vendi ynë është pa Komision për Antikorrupsion. Plotësimi i vendeve të zbrazura të këtij komisioni, pasi që pesë anëtarë dhanë dorëheqje, mbeti i bllokuar në Kuvend për shkak se nuk ka marrëveshje mes pushtetit dhe opozitës. Burime partiake thonë se në krye të këtij komisioni do të ulet ekspert i emëruar nga ana e opozitës, për çka janë formuar edhe grupe pune, por pas një takimi, negociatat janë ndërpre për shkak të mos-pajtueshmërive.

Ish-anëtarja e Komisionit Antikorrupsion, Sllagjana Taseva, vlerëson se mos-funksionimi i këtij organi, i cili duhet të kontrollojë pronën e funksionareve, por edhe të vendos në situata kur ka konflikt interesi, është në dëm të shtetit.

Edhe ish-kryetari i komisionit Antikorrupsion, Voisllav Zafirovski, vlerëson se qëllimisht po zvarritet kompletimi i këtij organi. Ai dyshon se nuk ekziston vullnet i vërtetë politik për luftë kundër korrupsionit dhe nepotizmit.

Përderisa nuk po arrihet kompromis për çështjen se kush do të jetë kryetar i këtij Komisioni, kryeministri Zoran Zaev, pohon se më së miri është që një ekspert të ulet në krye të Komisionit Antikorrupsion.

“Dua të shoh ekspertë dhe profesionistë të cilët do të sjellin shpresë për qytetarët se Komisioni Antikorrupsion pas disa viteve me të gjithë kapacitetin e vet do ta kryejë punën sipas ligjit”, tha Zoran Zaev.

Por, me zgjidhje të tillë nuk pajtohet Taseva, sipas së cilës do të vazhdohet me praktikën e punës politike të këtij organi.

Pasi që DAP-i përgatiti raport revizor i cili tregoi se një pjesë e anëtarëve të këtij komisioni kanë bërë shpenzime të pabaza, pesë anëtarë dorëzuan dorëheqje. Hetim në lidhje me këtë hapi edhe Prokuroria Themelore. Në ndërkohë Komisioni po funksionon vetëm në mënyrë administrative./tv21/