Peja dënohet me 925 euro

Skuadrës së Pejës i është shqiptuar dënimi prej 925 eurosh nga Federata e Basketbollit të Kosovës, për shkak të veprimeve dhe sjelljeve josportive në ndeshjen derbi të javës së dhjetës kundër Sigal Prishtinës.

Ndeshja e zhvilluar të shtunën në Karagaç të Pejës ndërmjet KB Pejës dhe Sigal Prishtinës, përpos spektaklit në lojë, ishte spektakolare edhe jashtë saj. Por kësaj here për të keq, raporton Zëri.

Pak më shumë se 5 minuta nga fundi i takimit, ekipi vendas u tërhoq si shenjë e pakënaqësisë së vendimit të gjyqtarëve të ndeshjes për ta zbrazur palestrën nga shikuesit, të cilët disa herë hidhnin gjësende në fushë.

Edhe pse sanksionimi për një veprim të tillë është i definuar qartësisht me rregulloren e FBK-së, e tëra çfarë ka ndërmarrë Komisari i Garave për këtë rast ka qenë dënimi prej 75 eurove si pasojë e gabimit teknik dhënë skuadrës së Pejës për arsye të braktisjes së fushës.

Po ashtu, është dënuar edhe trajneri Daniel Lutz, për shkak të gabimit teknik të përsëritur me 150 euro, derisa dënimit nuk i ka shpëtuar as Simoviç që është gjobitur për sjellje jo sportive me 50 euro.

Trajnerit Lutz sot iu shqiptua edhe një dënim tjetër prej 200 eurosh, për shkak të deklaratës së dhënë për gazetën SportPlus me 2 dhjetor ku ka kritikuar ndarjen e drejtësisë nga ana e gjyqtarëve të ndeshjes.

Ekipi pejan është dënuar edhe për hedhje të gjësendeve në fushë dhe fishekzjarrëve me 300 euro. Peja po ashtu do të luajë ndeshjen e radhës pa shikues si rezultat i dënimit pas zbrazjes së palestrës, kur edhe u godit me shishe lojtari i Sigal Prishtinës, Tay Waller.

Për shkak të ofendimeve dhe kërcënimeve ndaj gjyqtarit, është dënuar edhe kryetari i klubit, Art Gashi, me 150 euro.

Në anën tjetër, te Sigal Prishtina është dënuar vetëm qendra amerikane K’Zell Wesson me 50 euro për sjellje josportive. /Telegrafi/