Nxënësit në Kumanovë duhet të paguajnë 100 denarë për një karrige

Para çdo fillimi të mësimit në shkollën fillore “Bajram Shabani” në Kumanovë, nxënësit duhet që nëpër klasat e tjera të gjejnë karrige për t’u ulur. Kështu ndodhë në këtë shkollë ku në shumë klasa hasen banka të gërvishtura e karrige të thyera. Arsimtarja e fizikës Xhejlane Selmani, pasi që i rehaton nxënësit në kabinetin e muzikës, thotë se inventari i vjetruar nuk është problemi i vetëm në këtë shkollë.

“Po ka mungesë, madje ende shëtisim nëpër klasa. Një paralele komplet e kompenson klasën tjetër, çdo herë kush ka edukatë fizike, tek ajo klasë shkojmë të zhvillojmë mësimin. Prej katit parë deri tek i treti endemi për të gjetur ku ka klasë të lirë e pastaj të brengosemi për inventarin”, u shpreh Xhejlane Selmani për TV21.

Kjo situatë e shtyri Këshillin e prindërve të gjej donacion nga Gjermania për të sjell banka e karrige të reja. Megjithëse ato janë falas, ky Këshill kërkon nga nxënësit mjete për pagesën e transportit.

Kryetari i Këshillit të prindërve, Armend Destani, thotë se drejtoria e shkollës raportoi për inventarin e vjetruar, por është e pafuqishme financiarisht të paguaj transportin mbi 2.000 eurove. Ai tha se Këshilli vendosi të kërkojë nga 100 denarë për secilin nga 1.200 nxënësit e Shkollës fillore “Bajram Shabani”.

Nga Komuna e Kumanovës thonë se buxheti është i limituar dhe mundësia e vetme janë donacionet.

Ndërsa nga Ministria e Arsimit, thonë se në shkollat publike nuk duhet të kërkohen para nga nxënësit, por nuk japin përgjigje se pse nuk janë ndërmarr masat.