Në Komunën e Gjilanit, shumë iniciativa për të luftuar stereotipet gjinore dhe diskiriminimin ndaj grave

Në shoqërinë moderne, përfaqësimi i barabartë i grave në vendimmarrje është një tregues i rëndësishëm i demokracisë dhe zhvillimit të qëndrueshëm.

Përfshirja e grave në nivel lokal, jo vetëm që promovon drejtësinë sociale, por gjithashtu sjell përfitime të dukshme për komunitetet dhe shoqërinë në tërësi.

Pesë gra drejtore në drejtori komunale, ndërsa 12 gra në asamble komunale në Gjilan, është treguesi më i mirë se gratë kanë përspektivë unike dhe të vlefshme për zhvillimin e politikave që prekin jetën e përditshme të qytetarëve.

Zyrtarja për barazi gjinore në Kuvendin Komunal në Gjilan, Lindita Salihu thotë për Telegrafin se stereotipet gjinore dhe diskrimini ndaj grave janë çështje mjaft komplekse.

“Pjesëmarrja e grave në vendimmarrjen lokale, niveli i inkurajimit të tyre, dhe përpjekjet për të luftuar stereotipet gjinore dhe diskriminimin janë çështje mjaft komplekse, por që duhet te besojmë se mund t’i permiresojme duke bëre perpjekje te vazhdueshme”, ka thënë Salihu.

Ndër të tjera, Salihu shtoi se ka shumë iniciativa për të luftuar stereotipet gjinore dhe diskiriminimin.

“Ka shumë iniciativa për të luftuar stereotipet gjinore dhe diskriminimin. Këto përfshijnë trajnime për ndjeshmërinë gjinore, kampanja ndërgjegjësimi të organizuara në bashkëpunim me organizata joqeveritare dhe institucionet arsimore”, ka theksuar ajo.

Salihu tutje thotë se ka shumë raste kur vajzat dhe gratë nuk kanë mundësi të barabarta për zhvillim professional ose punësim për shkak të qasjes jo të barabartë.

“Diskriminimi gjinor dhe stereotipet kulturore, ndikojnë në mundesitë e vajzave dhe grave per te avancuar në karrierë dhe për të marrë pozita udhëheqëse, dhe krejt kjo për shkak te pabarazive qe fillojne me trajtimin jo te barabarte nga familja, qysh në vegjëli për të vazhduar pastaj në shkolle, në vend pune e tutje”, ka thënë tutje ajo, duke theksuar se vajzat nuk rriten me vetëbesim për të vazhduar të vendosura në kërkesat dhe synimet e tyre.

“Vajzat nuk rriten me vetëbesim, për të vazhduar pastaj të vendosura në kërkesat dhe synimet e tyre. Në përgjithësi, vendimmarrja lokale synon të adresojë në mënyrë efektive dhe efikase nevojat dhe kërkesat e qytetarëve ne nivel lokal”, ka theksuar Salihu.

Mirëpo, pavarësisht sfidave për luftimin e këtyre stereotipeve, Salihu thotë se si zyre për baraza gjinore në bashkëpunim me OJQ-të e ndryshme ndërkombëtare e lokale, punojnë në vazhdimësi për të promovuar barazinë gjinore.

“Iniciativat për inkurajimin e grave për të marrë pjesë në vendimmarrje përfshijnë programe trajnimi, mentorimi dhe kampanja ndërgjegjësimi. Si zyre e barazisë gjinore në bashkëpunim me OJQ-të e ndryshme ndërkombëtare e lokale, punojme në vazhdimesi për të promovuar barazinë gjinore dhe për të fuqizuar vajzat dhe gratë në nivel lokal”, ka potencuar Salihu.

Ndërsa, Arjeta Maka, koordinatorja e organizatës joqeveritare “Gruaja Hyjnore” thotë për Telegrafin se kjo OJQ organizon evente të ndryshme për të luftuar stereotipet dhe për t’iu ofruar ndihme grave gjilanase.

“OJQ Gruaja Hyjnore organizon workshope të ndryshme si: punëtoritë psiko-sociale, ku grave dhe vajzave u ofrohet ndihmë profesionale, sesione individuale ose grupore, punëtori kreative-relaksuese, ku grave dhe vajzave u ofrohet mbështetje emocionale përmes, punë krijuese si: qëndisja, kultivimi i luleve, arti figurativ etj, punëtori për edukim shëndetësor primar dhe mjekësi parandaluese, punëtori për ndërgjegjësimin e grave për të drejtat e tyre dhe njohuri për barazinë gjinore, aktivitete për ngritjen e nivelit të arsimimit të grave dhe vajzave si: kurse rrobaqepësie, kurse artizanale, kurse teknologjie informative, trajnime për fillimin dhe avancimin e biznesit të grave dhe programeve mikroekonomike”, ka thënë Maka.

Maka thekson se gratë në Kosovë përfaqësojnë një pjesë të vogël të pronave të bizneseve.

“Fuqizimi i përgjithshëm i grave është i ndërlidhur ngushtë me fuqizimin e tyre ekonomik, qoftë në aspektin e punësimit qoftë në atë të sipërmarrjes. Megjithëse gratë në Kosovë përfaqësojnë një pjesë të vogël të pronarëve të bizneseve, ky raport tregon se bizneset e tyre janë pjesë përbërëse e rëndësishme e strukturës socio-ekonomike”, ka theksuar ajo.

Tutje, Maka thotë se përceptimi se gratë nuk janë të afta për të bërë biznes me profesione të ndryshme, duhet të ndryshohet.

“Perceptimi se gratë nuk janë të afta për të bërë  binese me profesonet endryshme duhet të ndryshohet, në mënyrë që gratë të  motivohen jo vetëm që të bëjnë biznes por në fakt të zhvillojnë biznesin e tyre dhe të kontribuojnë në ekonominë e Kosovës”, ka thënë ajo.

Ndryshe, OJQ “Gruaja Hyjnore” është një organizatë me seli në Gjilan, organizatë kjo e cila është themeluar me qëllim të vetëdijësimit të gravë në Kosovë, përkatësisht në rajonin e Gjilanit. /Telegrafi/.