Me vegjetarianizëm kundër ngrohjes globale

Ish-anëtari i grupit të famshëm britanik Beatles, Paul McCartney, u ka bërë thirrje njerëzve të zgjedhin vegjetarianizmin si një prej mënyrave të luftës kundër ndryshimeve klimatike.

Në një intervistë dhënë organizatës për mbrojtjen e të drejtave të kafshëve “Njerëzit për trajtim etik të kafshëve” (PETA), McCartney ka thënë se industria globale e mishit është ndotës i madh i mjedisit.

“Ndryshimi më i madh të cilin secilin mund ta bëj në jetën e tij është që të bëhet vegjetarian’, ka thënë McCartney, një vegjetarian shumëvjeçar dhe lobist i vegjetarianizmit.

“Dua t’u bëj apel njerëzve të mendojnë për këtë hap të thjeshtë në mënyrë që t’i ndihmohet mjedisit tonë të çmuar dhe ta ruajmë atë për fëmijët e së ardhmes”.

McCartney ka tërhequr vëmendjen se industria e mishit ka rol të madh në ndryshimet klimatike dhe ka shprehur keqardhje që shumica e organizatave për mbrojtjen e mjedisit, në mesin e prioriteteve të tyre, nuk e theksojnë vegjetarianizmin.

“Është për tu çuditur se shumica e organizatave për mbrojtjen e mjedisit e lënë anash opsionin e vegjetarianizmit nga gjërat e tyre kryesore për luftimin e ngrohjes globale”, ka thënë ai.

Raporti i Kombeve të Bashkuara për vitin 2006 ka vërtetuar se kultivimi i gjedheve shkakton më shumë gazra të serave sesa trafiku.