LSDM: Prilepi nuk ka stacione matëse për cilësinë e ajrit

Partia maqedonase në opozitë LSDM, thotë se pushteti lokal i OBRM-PDUKM-së-së po helmon qytetarët e Prilepit. Nga LSDM thonë se prej ditësh ndotja e ajrit në qytet është e dukshme me sy të lirë.

“Ajri jashtëzakonisht i ndotur pickon sytë, hundën dhe fytin. Përderisa në qytetet e tjera të rrënuara nga i njëjti problem, kryetarët e komunave kërkojnë zgjidhje për t’u përballur me ajrin e ndotur, Borçe Jovçeski nuk ka një mendim të tillë”, thotë Ivona Kuzmanoviq, anëtare e Këshillit të Komunës së Prilepit nga radhët e LSDM-së.

“Për Jovçeskin dhe OBRM-PDUKM-në, banorët e Prilepit nuk kanë problem me ndotjen, sepse stacionet matëse nuk tregojnë një gjë të tillë. Dhe nuk e tregojnë sepse nuk ekzistojnë. Prilepi është i vetmi qytet në Maqedoni që nuk ka stacione monitoruese për matjen e cilësisë së ajrit, prandaj nuk e dimë shkallën e ndotjes së tij”.

“Por ajo që dimë është se po thithim ajër kancerogjen, se ajri i ndotur po merr një numër gjithnjë e më të madh jetësh çdo vit dhe se qeveria e OBRM-PDUKM-së, si në nivel qendror ashtu edhe në atë lokal, as nuk ka ndërmend dhe as nuk di se si të merret me problem. Në fund të fundit, Jovçeski dhe OBRM-PDUKM-ja asnjëherë nuk janë shprehur për këtë temë dhe nuk kanë treguar shqetësim për shëndetin e prilepitëve. Këtë e dëshmon edhe fakti se nuk i realizuan mjetet prej 1.5 milionë euro që Qeveria e LSDM-së i ndau për ndërtimin e fabrikës për riciklimin e mbeturinave dhe se lejuan që deponia afër Alincit të digjet dhe të ndotet më tej edhe në dimër”, tha Kuzmanoviq.