LSDM kërkon dorëheqjen e Toshkovskit: Të ketë hetim të detajuar për keqpërdorimin e kufijve

LSDM në një konferencë për media kërkoi dorëheqjen e ministrit të Punëve të Brendshme Pançe Toshkovski, pas ngjarjes me kryetarin e Kuvendit Afrim Gashi, i cili me makinën zyrtare mori pjesë në një dasmë në Kosovë.

Nga LSDM kërkojnë edhe deklasifikimin e pamjeve nga pika kufitare dhe hetim të plotë të ngjarjes.

“Është koha e përgjegjësisë, aty ku i takon realisht, duke filluar nga ministri Toshkovski e deri në fund. Kërkojmë që pamjet nga pika kufitare Bllacë të deklasifikohen plotësisht dhe të publikohen gjatë gjithë ditës. Qytetarët duhet të shohin se kush ka kaluar pa kontroll, por edhe të shohin nëse automjetet tjera lejohen në pikën kufitare Bllacë. Ajo do të jetë gjithashtu bazë për të vepruar autoritetet hetimore. Ne kërkojmë që Toshkovski të japë dorëheqje. Në këtë mënyrë do t’i lërë hapësirë ​​organeve hetimore, Prokurorisë Publike, në procedurë transparente dhe pa presion për të përcaktuar përgjegjësinë e të gjithë të përfshirëve në këtë skandal të madh. Prokuroria duhet të hapë një hetim të detajuar dhe ky skandal të zgjidhet. Kushdo që ka shkelur ligjin duhet të mbajë përgjegjësi”, tha Bogdanka Kuzeska, zëdhënëse e LSDM-së.

“Ky është një skandal i madh që nuk nënkupton vetëm keqpërdorim të rëndë të pikës kufitare, por edhe arbitraritet, shkelje të ligjeve dhe krime të mundshme të kryera që ende nuk janë hetuar. Siguria e kufijve tanë është cenuar dhe kontrolli kufitar është pezulluar plotësisht dhe është vënë nën komandën partiake të VLEN-it dhe OBRM-së. Kjo është e palejueshme dhe e rrezikshme për shtetin anëtar të NATO-s dhe duhet të ketë përgjegjësi”, tha ajo.