Kurti kujton miratimin e Rezolutës mbi gjenocidin në Kosovë

Lideri i Lëvizjes Vetëvendosje, Albin Kurti ka thënë se Kuvendi i Republikës së Kosovës ka marrë vendime të mira, duke marrë shembull miratimin e rezolutës mbi gjenocidin e kryer nga Serbia në Kosovë, e cila ka bërë tetë muaj nga miratimi.

Ai u shpreh se kjo është njëra ndër vendimet e marra nga Kuvendi, por që tash nevojitet qeveri dhe institucione të vullnetshme për t’i respektuar këto vendime.

Dita e Përkujtimit të gjenocidit ndaj shqiptarëve në Kosovë është shpallur 15 janari, kurse kjo rezolutë, thotë Kurti, i referohet konventave, deklaratave, gjykatave, rezolutave e raporteve të ndryshme ndërkombëtare.

Miratimi i rezolutës u bë me 79 vota për, kurse në bazë të të dhënave do të listohen faktet e krimeve të gjenocidit, krimeve kundër njerëzimit dhe krimeve të luftës në Kosovë.

“Nesër bëhen tetë muaj prej kur në Kuvendin e Republikës u miratua Rezoluta mbi gjenocidin e kryer nga Serbia në Kosovë. Aty u vendos që 15 janari, pra dita e masakrës së Reçakut, të shpallet Ditë e Përkujtimit të gjenocidit ndaj shqiptarëve në Kosovë. Rezoluta i referohet konventave, deklaratave, gjykatave, rezolutave dhe raporteve të ndryshme ndërkombëtare. Në bazë të të dhënave zyrtare listohen faktet e krimeve të gjenocidit, krimeve kundër njerëzimit dhe krimeve të luftës në Kosovë. Rezoluta përmban kërkesa ndaj Serbisë por edhe zotime tonat si shtet për të sjellur drejtësi, reparacion e rehabilitim për viktimat. Miratimi asokohe u bë me 79 vota PËR. Nuk është që Kuvendi i Kosovës nuk ka marrë edhe këso vendimesh të mira, prandaj tash na nevojiten qeveri dhe institucione të vullnetshme që do t’i respektonin e zbatonin ato”, shkruan Kurti. /Telegrafi/