Krasniqi-Hotit: Përdoreni mbështetjen e SHBA-ve për forcimin e sovranitetit

Ish-kryetari i Kuvendit dhe tash kryetari i Këshillit Kombëtar të Nismës për Kosovën, Jakup Krasniqi, duke iu përgjigjur ministrit Avdullah Hoti, ka thënë se nëse është e vërtetë që LDK ka mbështetjen e SHBA-ve, atëherë kjo do të duhej të përdoret për forcimin e sovranitetit të shtetit që me fusnotë është lënë pa sovranitet.

Gjithashtu, sipas Krasniqit kjo mbështetje e Amerikës do të duhej ta përdornin për ruajtjen e tërësisë territoriale dhe jo për humbjen e 8200 hektarëve.

Postimi i plotë i Krasniqit në facebook:

“Thirruni në Amerikën për mbrojtje të Sovranitetit të Shtetit?!

Ministri Hoti paska thënë: “Lidhja Demokratike është partneri më kredibil i SHBA-s, ne do ta procedojmë të hënën në Kuvend, për këtë jemi koordinuar edhe me amerikanët”. Fjalën e ka për Ratifikimin e Demarkacionin me Malin e Zi!

Nëse është kështu, mirë fortë, por përdorni mbështetjen e SHBA-ve për forcimin e sovranitetit të shtetit që me fusnotë e keni lënë pa te dhe përdoreni Amerikën për ruajtjen e tërësisë territoriale e jo për humbjen e 8200 hektarëve. Nxirrni mësimet e duhura sesi ndërtohet shteti i se drejtës, si ndahen e funksionojnë pushtetet, si zbatohen ligjet, si funksionon gjyqësori, si zhvillohet vendi dhe si përparohet arsimi e përmirësohet shëndetësia! Këto këshilla duhet t’i merrni nga Amerika! Atëherë do t’ju besoja se vërtetë e keni mbështetjen Amerikane!

Kur ta luftoni krimin e korrupsionin që po e han pavarësinë, sovranitetin e territorin, kur ta luftoni nepotizmin e pa ligjësitë e grumbulluara si stoqe, kur të hapni perspektiva për qytetarët, kur zhvilloni vendin e ngriteni mirëqenien qytetare, siguroni e garantoni sovranitetin e shtetit, do t’ju kuptojmë edhe kur thirreni në mbështetjen Amerikane! Atëherë sinqerisht do t’ju besojmë se do të kemi përse! Kështu si po veproni ju qeveritarët po e fyeni demokracinë amerikane!

Përndryshe, nëse jeni të bindur se keni qeverisur mirë, pse frikësoheni për t’ju drejtuar qeveritarëve për një mandat të dytë?

Qeveritarë: Qytetarët nuk ushqehen ma me deklarata boshe! Ata donë siguri e mirëqenie që e shohin dhe e prekin përditë!”, ka shkruar Krasniqi. /Telegrafi/