Korenica vazhdon të bëjë magji, Prishtina merr fitoren e katërt radhazi

Prishtina ka arritur fitoren e katërt radhazi, pasi para adhuruesve të vet ka mposhtur Lirinë e Prizrenit me rezultat 3-0.

Prishtina që nga fillimi i ndeshjes ishte më e mirë duke sulmuar vazhdimisht portën e Lirisë.

Gauthier Mankenda me dy raste shënimi dhe Ergyn Ahmeti me një tjetër rrezikuan fillimisht.

Tifozët e pranishëm në shkallët e stadiumit Fadil Vokrri për ta parë golin e parë u desh të pritnin minutën e 36-të, kur Ergyn Ahmeti me një goditje të fortë nga distanca realizoi për 1-0.

Me epërsinë minimale të kryeqytetasve përfunduan 45 minutat e para të kësaj sfide.

Në pjesën e dytë ishte radha që mesfushori më i mirë në Kosovë, Meriton Korenica të dhurojë spektakël.

Ishte minuta e 52-të e ndeshjes kur rahovecasi realizoi për 2-0 pas asistimit nga Armend Thaqi.

Nëntë minuta më vonë, sërish në skenë doli reprezentuesi i Kosovës U-21, kur realizoi golin e dytë personal dhe të tretin për Prishtinën për 3-0.

Ishte ndeshja e tretë radhazi që Korenica realizon nga dy gola me fanellën e Prishtinës, pasi një gjë të tillë e bëri edhe ndaj Flamurtarit dhe Ballkanit.

Prishtina me këtë fitore vazhdon të mbetet e dyta në tabelë me 56 pikë, tri më pak se lideri Feronikeli.

Ndërkohë Liria vazhdon të mbetet e parafundit në tabelë me 24 pikë pas 25 ndeshjeve.

Ndeshjen e radhës Prishtina e zhvillon në udhëtim te Ferizaj, derisa Liria pret liderin Feronikelin. /Telegrafi/