Një palestinezo-amerikan u rrah për vdekje nga kolonët në Bregun Perëndimor të pushtuar nga Izraeli dhe një tjetër u qëllua për vdekje, njoftoi Ministria Palestineze e Shëndetësisë.
Shtetasi amerikan Sayafollah Musallet, 20 vjeç, i njohur gjithashtu si Saif, u rrah rëndë në incidentin në Sinjil, në veri të Ramallah.
Ndërsa Husein Al-Shalabi, 23 vjeç u qëllua në gjoks.
Familja e Musallet, nga Tampa Florida, tha në një deklaratë se mjekët u përpoqën ta arrinin atë, por ai vdiq para se të shkonte në spital, shkruan BBC.
"Ky është një makth dhe padrejtësi e paimagjinueshme që asnjë familje nuk duhet të përballet kurrë. Ne kërkojmë që Departamenti i Shtetit të SHBA-së të udhëheqë një hetim të menjëhershëm dhe t'i mbajë kolonët izraelitë që vranë Saifin përgjegjës për krimet e tyre", thuhet në deklaratën e familjes.
Një zëdhënës i Departamentit të Shtetit të SHBA tha se ishte në dijeni të incidentit, por se departamenti nuk kishte komente të mëtejshme "për respekt të privatësisë së familjes dhe të dashurve" të viktimës së raportuar.
Ndryshe, ushtria izraelite tha se Izraeli po heton incidentin.
Raportohet se dhuna e kolonëve në Bregun Perëndimor është rritur që nga fillimi i luftës së Izraelit kundër grupit militant palestinez Hamas në Gaza në fund të vitit 2023, sipas grupeve të të drejtave. /Telegrafi/
