Hysaj: Shiriti i kapitenit, kënaqësi dhe përgjegjësi

Elseid Hysaj pritet të marrë shiritin e kapitenit për herë të parë në një ndeshje zyrtare nga minuta e parë në sfidën ndaj Francës.

Në miqësoren ndaj Katarit, ai u bë kapiteni më i ri në histori të Kombëtares shqiptare, por rritja e tij si lojtar ka bërë që të etiketohet si pasardhës i denjë i Lorik Canës dhe këtë pritet ta dëshmojë të mërkurën.

Shiriti i kapitenit është shumë i rëndësishëm për lojtarin e Napolit, i cili në konferencën e të dielës tha se ndihet shumë krenar, por që ndjen se i shtohen më shumë përgjegjësitë në fushë dhe jashtë saj.

“Shiriti i kapitenit është i rëndësishëm për mua, është po ashtu edhe kënaqësi e madhe, por që kërkon më shumë përgjegjësi si lojtar në fushë por edhe si njeri”, është shprehur Hysaj, citon TCH.

Mirëpo, shkodrani thotë se Gianni de Basi ende nuk ka vendosur se kujt do t’i besohet shiriti, edhe pse Cana, pasi u ndëshkua me të kuq, ia dha atij. Por, ai siguron se do të japë gjithmonë maksimumin në fushë.

“Ende nuk e di nëse do jem kapiten, por ajo që di është fakti se do të jap maksimumin për skuadrën dhe do të mundohemi që të qëndrojë sa më gjatë në Francë”, ka shtuar ai.