Google shfaq pamjet e Nexus 8

Google e ka zbuluar edhe një pajisje të re mobile, por mendohet se këtë e ka bërë aksidentalisht. Me sa duket Google nuk është e mirë në ruajtjen e sekreteve, pasi që edhe për modelin e saj të fundit të telefonit, Nexus 5, shumë kohë para lansimit zyrtar ishin publikuar foto, video dhe karakteristika të tjera, të cilat më pas kanë rezultuar të jenë të sakta, pasi që të njëjtat janë prezantuar edhe zyrtarisht.

Kësaj radhe nuk bëhet fjalë për ndonjë model të ri të telefonit, pasi që Google rastësisht tani e ka publikuar një fotografi të tabletit të saj të ardhshëm të linjës Nexus – modelin e ri Nexus 8.

Fotografia e publikuar nga ArsTechnica shfaq tabletin e ri të Google për të cilin thuhet se do të ketë një ekran të ndjeshëm në prekje me diagonale prej 8 inç dhe butonin në pjesën e sipërme të ekranit.

Për më shumë, Nexus 8 thuhet se do ta ofrojë edhe ekranin më të fundit të LG-së me 8.3 inç, që do të thotë se Google do të bashkëpunojë me LG edhe për krijimin e tabletit të saj të ri, dhe ta braktis partnerin e mëparshëm Asus me të cilët kishte krijuar tabletët e saj paraprak. / Telegrafi /