Ekspertët ndërkombëtarë për demarkacion nuk ua mbushin syrin vendorëve

Opozitës dhe ekspertëve vendorë që kundërshtuan demarkacionin me Malin e Zi nuk ua mbush syrin komisioni ad-hoc me ekspertë ndërkombëtarë, të iniciuar nga presidentja Jahjaga.

Blerim Kuçi, nga Aleanca për Ardhmërinë e Kosovës, dhe Florim Isufi, ekspert i pavarur për çështjen e demarkacionit, në “Rubikon” të KTV-së thanë se komisioni ka mungesë të ekspertëve për fushën e trajtuar, transmeton Koha.net.

Në anën tjetër, përfaqësues nga pushteti thanë se nuk do të japin asnjë deklaratë, deri në rezultatet e ekspertëve ndërkombëtarë, për t’u ikur të gjitha dyshimeve të mundshme për një ndikim politik.

Ekspertët ndërkombëtarë, që po qëndrojnë në Kosovë, tanimë janë takuar edhe me dy profesorët e gjeografisë, ekspertë të pavarur për çështjen e demarkacionit me Malin e Zi.

Florim Isufi tha se kanë mbajtur dy takime, të cilat kanë zgjatur më orë dhe për detajet e të cilave ka thënë se nuk mund t’i zbulojë.

“Ne i kemi dhënë gjithë materialin hartografik që e kemi në dispozicion. Kemi tentuar që të kemi një material gjithëpërfshirës dhe jo vetëm të një burimi. Jemi nisur me ato të viteve 1988 dhe viteve më vonë, për të parë një vazhdimësi të tyre. Kemi debatuar gjatë për të gjitha materialet të cilat komisioni nuk i ka përfshirë”, ka thënë Isufi.

Duke përmendur dy takimet mes tyre, Isufi ka thënë se është parë një interes i veçantë dhe i madh nga ata për trajtimin e kësaj çështjeje.