Stil Sport / Fitnes

Ecja e shpejtë, më e mirë për zemër

Para 10 vitesh

Marrja me sport është mbrojtja kryesore kundër sulmit në zemër dhe sëmundjet kardiovaskulare, ndërsa kardiologët i rekomandojnë ushtrimet e rregullta edhe për pacientët pas infarktit.

Pasiviteti fizik është një faktor rreziku për zhvillimin e arteriosklerozës dhe sëmundjes koronare. Janë dëshmuar efekte të dobishme të aktivitetit fizik në parandalimin e sëmundjeve koronare. Studimet kanë treguar se njerëzit me gjendje të mirë fizike kanë dy herë rrezik më të ulët të sëmundjeve kardiovaskulare, madje edhe në prani të faktorëve kryesorë të rrezikut: hipertensionit, diabetit, pirjes së duhanit, trashësisë.

Për ta mbajtur sa më gjatë zemrën vitale përmes ushtrimeve, së pari bëni një ekzaminim mjekësor. Edhe në qoftë se jeni krejtësisht të shëndetshëm, ju nuk mund të dini me siguri se si organizmi juaj reagon ndaj ngarkesës që është karakteristike gjatë procesit të ushtrimeve. Ekzaminimi nënkupton matje dhe testime të parametrave në bazë të të cilave konfirmohet niveli i gjendjes fizike dhe krijohet një program adekuat i ushtrimeve.

Personat të cilët janë aktivë gjatë gjithë ditës përmes aktiviteteve të ndryshme, si pastrimi, kopshtaria ose ecja, djegin më shumë kalori dhe janë përgjithësisht më të shëndetshëm se personat që ushtrojnë çdo ditë për 30-60 minuta, ndërsa pjesën tjetër të kohës rrinë.

Ushtrimi me intervale
Është i shkëlqyeshëm për parandalimin e sëmundjeve të zemrës dhe diabetit, humbjes së peshës dhe rritjes së fitnesit fizik. Kombinoni intervalet e shkurtra të ushtrimeve të intensitetit të lartë dhe të ulët. Për shembull, ecni ngadalë për tre minuta dhe pastaj një minutë vraponi shpejt. Rritja dhe zvogëlimi i numrit të rrahjeve të zemrës e përmirëson funksionin e zemrës, djeg kalori dhe ndihmon në konsumin e yndyrave dhe eliminimin e sheqerit të tepërt nga gjaku.

Ushtrimet aerobike
Këto janë ushtrime për tërë trupin, dhe nuk krijojnë presion në nyja. Me to inkurajohet puna e të gjitha muskujve, zemrës dhe gjithë sistemit të qarkullimit të gjakut. Skejtingu, noti, ecja, vallëzimi, vrapimi dhe çiklizmi janë vetëm disa nga ushtrimet aerobike.

Ushtrimet e forcës
Duke i forcuar muskujt do ta reduktoni ngarkesën e punës së zemrës. Ushtrimet e forcës i bëni me pesha. Zgjidhni ato ushtrime që e nxisin punën e një numri më të madh të grupeve të muskujve.

Ushtrimet për torzo
Përmes ushtrimeve për torzo do t’i forconi muskujt e torzos, do ta rritni fleksibilitetin dhe ekuilibrin. Do ta zvogëloni ngarkesën në shpinë dhe do ta inkurajoni qëndrimin e duhur. Me qëndrim të duhur do ta mundësoni qarkullimin normal të gjakut dhe në këtë mënyrë do ta lehtësoni punën e zemrës.

Joga
E rregullon nivelin e shtypjes së gjakut, ku si rezultat gjaku qarkullon më lehtë nëpër trup, dhe e zvogëlon ngarkesën e punës së zemrës.