Pep Guardiola thotë se Manchester Cityn e pret gara për mbijetesë nëse luan si në pjesën e parë të ndeshjes ndaj Aston Villas.
Kampioni i Ligës Premier ishte i frustruar në gjysmën e parë të takimit në Etihad Stadium, të cilin e fitoi pastaj me tre gola të shënuar në gjysmën e dytë.
Ajo që u tha trajneri lojtarëve në zhveshtore pati ndikim të menjëhershëm, pasi që në minutën e 46-të, Raheem Sterling e zhbllokoi rezultatin për të vazhduar pastaj me golat e Kevin De Bruyne (65') dhe Ilkay Gundogan (70').
"Para gjashtë ditësh ishim tetë pikë (prapa Liverpoolit), tash jemi tri. Nuk jam i shqetësuar për tabelën, por për mënyrën si luajtëm".
"Po të luajmë në nivelin që luajtëm në pjesën e dytë, jam i sigurt se në fund të sezonit do të jemi aty (në krye të tabelës)".
"Nëse luajmë në mënyrën si luajtëm në pjesën e parë, do të jemi në pozitat e rrezikshme të rënies nga liga, shumë larg nga liderët e tabelës. Kjo është analiza ime. Jo vetëm në këtë sezon, por gjatë gjithë kohës", ka deklaruar Guardiola. /Telegrafi/