Prej vitesh, ideja për të zhvilluar një ndeshje në Shtetet e Bashkuara ka qenë një dëshirë që La Liga ka synuar të eksplorojë dhe Barcelona pritet të jetë e përfshirë.
Në dy sezonet e kaluara, një nga ndeshjet e katalanasve është përfolur për t’u zhvendosur në Amerikën e Veriut, dhe ndonëse kjo nuk është realizuar deri tani, mund të bëhet realitet në vitin 2025.
Më herët këtë verë, u raportua se La Liga ka përzgjedhur ndeshjen e Barcelonës ndaj Villarrealit si përballjen ideale për t’u zhvilluar në SHBA.
Takimi i javës së 17-të, i cili është planifikuar të luhet menjëherë para pushimit dimëror, shihet si më i lehtë për të dy klubet për shkak të ndalesës së kampionatit pas tij.
Planet pritet të intensifikohen për ta bërë këtë realitet. Sipas Sport, çështja do të diskutohet mes drejtuesve më të lartë të futbollit spanjoll dhe, nëse miratohet, do të ndërmerren procedurat e nevojshme për të kërkuar që për herë të parë një ndeshje e La Ligës të zhvillohet jashtë territorit spanjoll. Më pas, kjo kërkesë do të dorëzohet në asamble për miratim.
Ky është sezoni i tretë radhazi që një ndeshje e përfshirë me Barcelonën është identifikuar nga La Liga për t’u zhvendosur në SHBA dhe kjo nuk është rastësi.
Për të siguruar sa më shumë interesim dhe vëmendje, synimi ka qenë që të përzgjidhet një ndeshje ku luan njëra prej Barcelonës dhe Real Madridit, dhe Barcelona shihet si më e hapur ndaj këtij propozimi në krahasim me madrilenët.
Për më tepër, Barcelona është e interesuar të vazhdojë të rrisë markën e saj në nivel global, ndërsa të ardhurat që do të gjenerohen nga kjo ndeshje do të ndihmonin gjithashtu në lehtësimin e vështirësive të tyre të njohura financiare./Telegrafi/