Kupa e Botës 2026 nuk do të jetë vetëm skena e fundit e madhe ndërkombëtare për legjenda si Lionel Messi dhe Cristiano Ronaldo, por edhe turneu ku shumë talente të reja do të përjetojnë eksperiencën e tyre të parë në nivelin më të lartë.
Më poshtë janë 10 lojtarët më të rinj që do të marrin pjesë në Botërorin që nis më 11 qershor 2026.
Mosha e tyre është llogaritur në ditën e hapjes së turneut.
10. Rayan Elloumi (Tunizi) – 18 vjeç, 8 muaj, 25 ditë
Sulmuesi i Vancouver Whitecaps bëri debutimin ndërkombëtar për dy kombëtare të ndryshme gjatë vitit 2026. Fillimisht luajti për Kanadanë në janar, ndërsa më pas vendosi të përfaqësojë Tunizinë, me të cilën do të marrë pjesë në Kupën e Botës.
Elloumi spikati me ekipin rezervë të Vancouverit në MLS Next Pro, duke treguar potencial të madh pavarësisht se ende nuk ka shpërthyer plotësisht në futbollin profesionist.
9. Kerim-Sam Alajbegovic (Bosnje dhe Hercegovinë) – 18 vjeç, 8 muaj, 21 ditë
Një nga talentet më premtues të futbollit boshnjak. Verën e kaluar u largua nga akademia e Bayer Leverkusen drejt Red Bull Salzburg për vetëm dy milionë euro.
Pas 9 golave dhe 3 asistimeve në kampionat, Leverkuseni aktivizoi klauzolën e riblerjes për tetë milionë euro. Në debutimin e tij me Bosnjën shënoi gol dhe dha asistim kundër San Marinos.
8. Ayyoub Bouaddi (Marok) – 18 vjeç, 8 muaj, 9 ditë
Mesfushori i talentuar i Lille u bë i njohur në moshën 17-vjeçare pas paraqitjeve mbresëlënëse në Ligën e Kampionëve kundër klubeve si Real Madrid, Juventus, Liverpool dhe Borussia Dortmund.
Ai ka kaluar mbi 3,000 minuta këtë sezon me Lille dhe pritet të jetë titullar i padiskutueshëm me Marokun në Botëror.
7. Mladen Jurkas (Bosnje dhe Hercegovinë) – 18 vjeç, 8 muaj, 4 ditë
Portieri i ri i Borac Banja Luka është një emër pak i njohur për publikun e gjerë, por jo për skautët.
Në 31 ndeshje kampionale ai pësoi vetëm 19 gola, mbajti portën e paprekur në 16 raste dhe udhëhoqi ekipin drejt titullit kampion. Madje, në disa ndeshje mbajti edhe shiritin e kapitenit.
6. Bara Ndiaye (Senegal) – 18 vjeç, 5 muaj, 21 ditë
Mesfushori qendror iu bashkua Bayern Munich në janar të vitit 2026 dhe la menjëherë përshtypje te trajneri Vincent Kompany.
Pas debutimit në Bundesligë në prill, ai luajti në tri ndeshje radhazi dhe siguroi edhe ftesën e parë me Senegalin për Kupën e Botës.
5. Hamza Abdelkarim (Egjipt) – 18 vjeç, 5 muaj, 10 ditë
Sulmuesi i talentuar u transferua në akademinë e Barcelonës dhe ka impresionuar me instinktin e tij para portës.
Në Botëror ai do të konkurrojë me Omar Marmoush për minuta loje, ndërsa raportohet se kapiteni Mohamed Salah e ka marrë nën kujdes për ta ndihmuar në hapat e parë me kombëtaren.
4. Ibrahim Mbaye (Senegal) – 18 vjeç, 4 muaj, 18 ditë
Anësori i ri i Paris Saint-Germain nuk luajti në fazat vendimtare të sezonit triumfues në Ligën e Kampionëve, por grumbulloi mbi 1,000 minuta në kompeticionet e tjera.
Me Senegalin ka qenë shumë më produktiv, duke regjistruar 8 kontribute në gola në vetëm 10 ndeshje.
3. Lennart Karl (Gjermani) – 18 vjeç, 3 muaj, 20 ditë
Një tjetër diamant i Bayern Munich. Ai regjistroi 9 gola dhe 8 asistime në të gjitha garat, duke tërhequr vëmendjen e trajnerit Julian Nagelsmann.
Karl madje la jashtë skuadrës disa emra të njohur si Karim Adeyemi dhe Kevin Schade, duke fituar vendin e tij në listën përfundimtare të Gjermanisë.
2. Hugo Sochurek (Çeki) – 18 vjeç e 4 ditë
Vetëm pak muaj më parë luante për ekipin U-19 të Sparta Prague dhe për kombëtaren U-17 të Çekisë.
Përparimi i tij ishte aq i shpejtë sa u bë titullar te skuadra e parë dhe fitoi ftesën e parë me kombëtaren seniore. Në Botëror do të jetë një nga lojtarët më të rinj të turneut.
1. Gilberto Mora (Meksikë) – 17 vjeç, 7 muaj, 28 ditë
Lojtari më i ri i Kupës së Botës 2026 është talenti meksikan Gilberto Mora.
Ai debutoi me kombëtaren e Meksikës në moshën 16-vjeçare, ndërsa në moshën 17-vjeçare ka zhvilluar tashmë mbi 50 ndeshje me Club Tijuana.
Mora konsiderohet si një nga talentet më të mëdha që ka prodhuar futbolli meksikan në vitet e fundit.
Falë aftësisë për të luajtur në disa pozicione sulmuese, ai pritet të jetë pjesë e formacionit titullar të Meksikës në Kupën e Botës 2026. /Telegrafi/