Vullnetarët australianë pozojnë lakuriq për të rritur ndërgjegjësimin rreth kancerit të lëkurës

Rreth 2500 vullnetarë të zhveshur kanë pozuar në mëngjesin e hershëm në plazhin Bondi të Sidneit për një vepër arti të krijuar për të rritur ndërgjegjësimin për kancerin e lëkurës.

Instalimi është projekti më i fundit i fotografit amerikan Spencer Tunick, që synon të inkurajojë australianët që të bëjnë kontrolle të rregullta të lëkurës.

Legjislacioni u ndryshua për të lejuar për herë të parë lakuriqësinë publike në plazh. Australia është vendi më i prekur në botë nga kanceri i lëkurës, thotë Fondi Botëror i Kërkimit të Kancerit.

Vullnetarët u mblodhën në plazh për të marrë pjesë në instalimin, i bërë në bashkëpunim me bamirësinë Skin Check Champions gjatë javës së ndërgjegjësimit për kancerin e lëkurës.

“Ne kemi një mundësi për të rritur ndërgjegjësimin për kontrollet e lëkurës dhe unë jam i nderuar… të vij këtu, të bëj artin tim dhe thjesht të festoj trupin dhe mbrojtjen”, tha artisti me famë botërore Tunick.

Bruce Fisher, 77 vjeç, i cili mori pjesë në ngjarje, i tha AFP “Kam kaluar gjysmën e jetës sime në diell dhe më janë hequr disa melanoma malinje nga shpina. Mendova se ky ishte një kauzë e mirë dhe më pëlqen të heq rrobat e mia në plazhin Bondi. Tunick është i njohur për krijimin e imazheve të nudove masive në disa nga vendet më ikonike të botës”. /Telegrafi/