Presidenti i SHBA-së, Donald Trump, ka kërcënuar të përdorë Departamentin e tij të Luftës të sapoemëruar në Chicago, duke rritur më tej tensionet mbi përpjekjen e tij për të vendosur trupa në qytetet amerikane të udhëhequra nga demokratët.
Ky veprim synon të përsërisë një operacion në kryeqytetin e SHBA-së, Uashington, ku Trump vendosi trupa të Gardës Kombëtare dhe rriti numrin e agjentëve federalë, duke shkaktuar një reagim të ashpër dhe një protestë të re që tërhoqi mijëra njerëz.
"Chicago së shpejti do ta zbulojë pse quhet Departamenti i Luftës", shkroi Trump në rrjetin e tij social Truth.
Guvernatori demokrat i Illinois, shprehu zemërim ndaj njoftimit të Trumpit, shkruan AP.
"Presidenti i SHBA-së po kërcënon me luftë një vend amerikan. Kjo nuk është shaka. Kjo nuk është normale", tha JB Pritzker.
Postimi i Trumpit përmban një imazh të tij, me sa duket të gjeneruar nga Inteligjenca Artificiale, dhe citatin: "Më pëlqen aroma e deportimeve në mëngjes" - një referencë për filmin e Luftës së Vietnamit të vitit 1979, Apocalypse Now.
Ndryshe, përveç Chicagos, Trump ka kërcënuar të rrisë numrin e trupave në Baltimore dhe New Orleans, të cilat drejtohen nga demokratët.
Ai nënshkroi një urdhër ekzekutiv që riemërton Departamentin e Mbrojtjes në Departamentin e Luftës, duke thënë se i dërgon një "mesazh fitoreje" botës. /Telegrafi/
