Pas një mungese të gjatë, grupi britanik indie-pop "The Ting Tings" është rikthyer fuqishëm me albumin e tyre të ri “Home”, gati dy dekada pas suksesit të madh që i ngjiti në krye të top-listave në Mbretërinë e Bashkuar me këngën debutuese “That’s Not My Name”.
Albumi i ri, i publikuar më 6 qershor, shënon një kthesë të dukshme në stilin muzikor të grupit, duke lënë pas ritmet elektronike për një tingull më organik dhe nostalgjik, të frymëzuar nga artistë të viteve të 70-ta si Fleetwood Mac, Joni Mitchell dhe The Eagles.
Dyshja e përbërë nga Katie White dhe Jules De Martino, të cilët janë partnerë edhe në jetë, realizuan albumin në studion e tyre personale në Ibiza — ishullin që e kanë quajtur shtëpi pas shumë viteve zhvendosjesh nga Londra në Berlin e Los Angeles, shkruan DailyMail.
Frymëzimi për projektin lindi gjatë periudhës së pandemisë, kur ata u bënë prindër për herë të parë dhe ndjenë nevojën për t'u rikthyer te rrënjët emocionale dhe muzikore.
Albumi “Home” përqendrohet në temat e faljes dhe fajit, dhe sjell këngë introspektive si “Good People Do Bad Things” dhe “Dreaming”, kjo e fundit me ndikime të qarta nga stili i Stevie Nicks.
Me këtë rikthim, grupi synon të ofrojë diçka më të thellë sesa thjesht ritme të kapshme – një reflektim i pjekurisë së tyre artistike dhe personale.
"The Ting Tings" u bë një sensacion global në vitin 2007 me albumin debutues “We Started Nothing”, i cili arriti dyfish platin në Mbretërinë e Bashkuar. Por rruga e tyre nuk ka qenë pa sfida, me albumet pasuese që nuk arritën të përsërisin suksesin fillestar.
Megjithatë, grupi e ka parë gjithmonë ndryshimin si pjesë të identitetit të tyre artistik. “Ne nuk besojmë te kufizimet stilistike”, ka thënë White në një intervistë. “Muzika është një fushë e hapur për eksplorim”.
“Home” është dëshmi e këtij eksplorimi dhe një ftesë për dëgjuesit të zbulojnë një tingull më të thellë, më të ndjerë dhe më autentik nga një grup që nuk ka frikë të evoluojë. /Telegrafi/
