Terapia GTP arrin sukses në luftën kundër sindromës së Daunit

Një terapi e veçantë me të cilën trajtohen personat të cilët vuajnë nga sindroma e Daunit (terapia GTP), gjatë të cilës këto persona lëvizin dhe vallëzojnë ka treguar rezultate të shkëlqyera në Slloveni, vend ky në të cilin çdo vit lindin nga 20 deri 26 fëmijë me këtë sindromë.

Terapia e shprehjes me anë të vallëzimit te të rinjtë me sindromën e Daunit, në fazën problematike të adoleshencës kur këto persona kuptojnë për sëmundjen e tyre, përforcon vetëbesimin e tyre dhe vepron pozitivisht në zhvillimin e personalitetit.

Metodat e reja mund të shmangin disa modele negative të sjelljes tek adoleshentët me sindromë të Daunit, siç është kokëfortësia të cilën e shkakton përvoja e parë e dështimit në dashuri. Po ashtu, këto metoda mund të përmirësojnë edhe komunikimin dhe kuptimin e gjërave të rëndësishme.

Një studim në të cilin janë përcjellë katër adoleshentë me sindromë të Daunit, të moshave nga 11 deri 14 vjeç, ka treguar se teoritë e mëparshme, të cilat pohonin se të sëmurët me sindromë të Daunit nuk janë në gjendje të zhvillojnë mendim kreativ, janë të gabueshme.

Terapia GTP u ka ndihmuar të jenë më të suksesshëm edhe në shkollë. Megjithatë, ekspertët thonë se në zhvillimin e këtyre fëmijëve më së shumti mund të ndikojnë prindërit të cilët duhet t’i shtyjnë ato më herët në programet të cilat i ofrojnë ekspertët, dhe në këtë mënyrë potencialet e tyre do të zhvillohen më mirë.