SWISS dhe EDELWEISS vazhdojnë operimin e tyre në Kosovë, paralajmërojnë linjën e re për Bazel

Një lajm i mirë për të gjithë qytetarët të cilët udhëtojnë në Zvicër erdhi këto ditë pas konfirmimit nga kompanitë e mirënjohura ajrore Swiss International Air Lines dhe Edelweiss Air.

Këto dy kompani të mëdha ajrore e kanë vazhduar marrëveshjen për operimin e tyre në Kosovë, dhe atë përmes kompanisë vendore Malësia Reisen.

Qytetarët e Kosovës dhe ata nga diaspora pritet të përfitojnë nga kjo marrëveshje duke siguruar çmime atraktive dhe shërbim cilësor për udhëtimet e tyre në Zurich apo Gjenevë, nga Prishtina apo edhe nga Shkupi dhe anasjelltas.

Përfaqësues të Malësia Reisen konfirmuan se janë kompania me udhëtimet më të shpeshta në/nga Zvicra, me 10 fluturime në javë Zurich – Prishtinë – Zurich, 5 fluturime në javë Zurich – Shkup – Zurich, 2 fluturime në javë Gjenevë – Prishtinë – Gjenevë dhe 1 herë në jave Gjenevë – Shkup – Gjenevë.

“Ne po punojmë vazhdimisht për të ofruar kërkesat dhe nevojat e bashkëatdhetarëve tanë duke ju siguruar atyre udhëtime të cilësisë dhe sigurisë së lartë. Ne gjithashtu po punojmë në hapjen e linjës së Bazel – Prishtinë me kompanitë e njohura SWISS dhe Star Alliance. Kjo padyshim do të ishte një lajm i mirë për të gjithë ne, që kompani të tilla të operojnë në vendin tonë”, u deklarua drejtori i kompanisë Avni Aliaj. /Telegrafi/