Shqiptarët nga Anglia ndihmojë fëmijët e verbër nga Kosova për tu zhvilluar në sport (Video)

Sot në sallën e sporteve të Pallatit të Rinisë në Prishtinë, Iniciativa “Kosovo Sports Relief” dorëzoi me sukses pajisjet sportive për Federatën e Sporteve për të Verbrit në Kosovë.

Këtë vit kjo iniciativë ka mbledhur fonde për ti plotësuar nevojat e 10 ekipeve të kësaj federate. Për të grumbulluar fonde anëtarët e iniciativës, kanë vrapuar 10km në Parkun Olimpik të Londrës, ku kanë arritur të mbledhin fonde të mjaftueshme për t’i siguruar 10 ekipeve pajisje të sportit GoalBall.

Iniciativa “Kosovo Sports Relief”, ka arritur të sigurojë 40 palë syze, 80 palë mbrojtëse për gjunjë dhe duar, 10 topa me zile, 40 palë trenerka, 40 çanta, një palë gola dhe mjete të tjera të nevojshme për të zhvilluar këtë sport, vlera e të cilave ka kaluar mbi 7000 euro.

Deri më tani këto ekipe kanë pasur pajisje të improvizuara gjë që ka pamundësuar që të luajnë së bashku apo të marrin pjesë në ndonjë garë sportive.

Pajisjet e siguruara nga iniciativa ”Kosovo Sports Relief”, mundësojnë lojtarëve të luajnë lojë të sigurt dhe pa lëndime. Ky sport, me rëndësi të shumëfishtë për të verbrit, topi i të cilit është me zile, tereni i markuar është sport ideal për të zhvilluar aftësitë për orientim edhe mobiliet i cili ju ndihmon ose ja lehtëson jetën e përditshme të verbërve.

Anëtarët nga Londra që punuan për këtë iniciativë janë: Ymka Stanovci, Baki Ejupi, Faton Gërbeshi, Nita Binxhiu- Demiri, Halil Demiri dhe Arben Haxhijaha
Anëtarët nga Kosova: Arton Humolli, Gonxhe Gërxhaliu, dhe Flaka Krajkova.