Shefi i prokurimeve të Volkswagen: Kemi vështirësi në gjetjen e çipave

Prodhuesi gjerman i veturave, Volkswagen po ka gjithnjë e më shumë probleme me prokurimin, veçanërisht me çipat, dhe pozicioni i tij në negociata në disa raste është dobësuar ndjeshëm, pranoi të martën shefi i prokurimeve Murat Axel.

“Ne nuk kemi folur kurrë me kompanitë minerare dhe tani e dimë modelin e tyre të biznesit. Nuk mjafton më të mbështetemi tek furnitorët kryesorë, duhet të shikojmë vetë pas perdes”, tha Axel.

Volkswagen po kalon një ndryshim, dikur diktonte kushtet në treg dhe tani është një klient më i vogël dhe më pak i rëndësishëm për furnitorët në fusha të reja të rëndësishme, si softueri, shpjegoi shefi i prokurimeve në një fjalim në Javën e Veturave.

Kompani të tjera porosisin miliona çipa në javë ose në ditë, dhe VW kërkon një milion në vit, gjë që zvogëlon fuqinë e saj negociuese, shpjegoi Axel. “Për shitësit e programeve kompjuterike, ne jemi një lojtar i vogël, jo një lojtar i madh,” shtoi ai.

I pyetur se si e shikon aktualisht situatën e furnizimit me çipa, Axel tha se pret që tensioni të zbutet pak vitin e ardhshëm, por VW, tha ai, ende nuk është në gjendje të mbajë kërkesën dhe disa marka janë shitur në vitin 2023.

“Ne kemi ndërtuar gjithashtu një bazë të dhënash që duhet të na lejojë të parashikojmë rreziqet gjeopolitike, natyrore dhe të zinxhirit të furnizimit, siç bëmë për rreziqet financiare pas krizës financiare të 2008”, pohoi Axel. /Telegrafi/