Rama shkruan për ditëlindjen e Thaçit: Ai është i marrë peng nga bashkësia e lartë ndërkombëtare

Kryeministri i Shqipërisë Edi Rama, nëpërmjet një postimi në rrjetin e tij social Facebook, ka uruar ish- presidentin e Kosovës, Hashim Thaçi, me rastin e ditëlindjes.

Përgjatë këtij mesazhi, kreu i qeverisë shqiptare ka artikuluar edhe disa pyetje, të cilat lidhen kryesisht me Fuqitë e Mëdha, që lindën Gjykatën e Hagës, nëse e kishin parashikuar se historia e kësaj gjykate “do të zhvillohej kaq zymtësisht e padrejtë me njerëz që luftuan për lirinë e popullit të tyre dhe me vetë Kosovën?!”.

Rama, thotë se Thaçi është një person i marrë peng nga bashkësia ndërkombëtare.

“Sot ka qenë një ditë e vrenjtur edhe brenda meje. Zakonisht në këtë ditë të vitit jam mësuar, prej vitesh, t’i uroj ditëlindjen sivëllait tim, Presidentit të Republikës së Kosovës, Hashim Thaçi. Dhe pengesa për t’ia uruar ditëlindjen një njeriu të dashur, të gjallë e të marrë peng në rrethana të njohura, jo nga forca të errëta e të panjohura, po nga Bashkësia e Lartë Ndërkombëtare, ka gjithë ditën që më rri mbi kokë si boshllëk i zymtë, thithës e lodhës”, shkruan Rama.

Kreu i qeverisë shqiptare nënvizon se nuk ka dashur që ta bëj që në mëngjes urimin digjital me foto e fjalë që i thuhen dikujt që edhe mund ta marrësh në telefon, por një ngërç e ka penguar “në formën e një inati nga pafuqia”.

“As e kam dot idenë nëse si vëllau im do të mund t’i lexojë sot këto rreshta, që as urim nuk janë edhe pse urimin që të jetojë sa malet e Shqipërisë unë po e bëj, por di me siguri që në këtë ditëlindje të Hashim Thaçit kam tërë ditën që më rri si gozhdë e ngulur në tru pyetja: A e dinin vallë ata, miqtë tanë të mëdhenj që e lindën atë gjykatë, se historia e saj do të zhvillohej kështu, kaq zymtësisht e padrejtë me njerëz që luftuan për lirinë e popullit të tyre dhe me vetë Kosovën?! Kam frikë se të vërtetën për këtë s’kam për ta marrë vesh kurrë. Po ndoshta këtë frikë e kam nga vranësira brenda meje që s’ia urova dot ditëlindjen Hashimit me telefon, siç jam mësuar prej shumë vitesh. Edhe 100 Komandant”, mbyll postin e tij kryeministri Rama.