Psikika është qenësore për zemrën

Kardiologët amerikanë dëshmojnë se problemet psikologjike, stresi dhe shqetësimi janë faktorët kryesorë të cilët kontribuojnë në zhvillimin e sëmundjeve kardiovaskulare. Nëse e mundni stresin, gjasat tuaja janë 60 për qind më të mira.

Personat të cilët arrin të zvogëlojnë nivelin e stresit apo e mbajnë atë nën kontroll kanë 60 për qind më pak gjasa të përjetojnë sulm në zemër dhe t’u nënshtrohen sëmundjeve për dallim prej atyre që janë nervoz dhe nuk mund të vet-kontrollohen, sipas një studimi të publikuar vikendin e fundit.

Nga 516 të sëmurë prej zemrës të cilët kanë marrë pjesë në hulumtim, 44 prej tyre kanë mbijetuar sulmin në zemër, e 19 kanë vdekur gjatë 3 deri në 4 vite të përcjelljes së tyre, ka thënë Yinong Young-Xu nga Shoqata Lown për sëmundjet e zemrës dhe të enëve të gjakut në Massachusetts të SHBA-ve.

Ai është autor kryesor i punimeve të cilat janë paraqitur në konferencën e 57-të të Shoqatës amerikane të kardiologëve (ACC) e cila mbahet prej 29 marsit deri më 1 prill në Chicago të shtetit Illinois.

"Në hulumtimet e mëhershme stresi psikologjik, qoftë i shkaktuar nga depresioni apo nervozizmi, është lidhur me përparimin e arterosklerozës, zhvillimin e trombozës (krijimin e dromcave) në arterie dhe rrezikun e shtuar nga aritmia e zemrës", ka theksuar Young-Xu.

Mirëpo, ai shton se, "ka pasur pak hulumtime të cilat janë orvatur të zbulojnë a është e mundur të përmirësohet gjendja kardiovaskulare e personit ashtu që të vërtetohet gjendja e tij/saj psikologjike dhe me anti-depresivë e psikoterapi të zvogëlohen simptomat e depresionit dhe shqetësimit".

Studimi më i ri do të duhej të nxisë kardiologët që në shërimin e zemrës dhe enëve të gjakut të mos injorojnë as problemet psikike të pacientëve të tyre, ka përfunduar Young-Xu.