Ndriçimi artificial, temperaturat e qëndrueshme dhe mungesa e ekspozimit natyror ndikojnë në ciklin e leshit të qenve që jetojnë në ambiente të mbyllura
Nëse jetoni me një qen në shtëpi apo banesë, ka shumë gjasa të jeni mësuar tashmë me praninë e qimeve në divan, në rroba apo në qilim. Por pse ndodh kjo më shumë te qentë që qëndrojnë brenda sesa ata që jetojnë jashtë?
Ndriçimi artificial ndryshon ritmet natyrore të trupit
Në natyrë, qeni i nënshtrohet rregullave të dritës ditore, ditët e shkurtra të dimrit dhe të gjata të verës ndikojnë në ciklin e leshit. Por në një mjedis të mbyllur, ndriçimi artificial shpesh zgjat përtej orëve natyrore të ditës. Kjo ndërhyn në funksionimin e hipofizës, gjëndrës që ndihmon në rregullimin e hormonit të rënies së qimeve. Si rezultat, qentë që jetojnë në ambiente të brendshme mund të humbasin qime gjatë gjithë vitit, edhe në dimër.
Mjedisi i ngrohtë dhe stabil stimulon rënien e qimeve
Temperaturat konstante në banesë, larg të ftohtit dhe lagështisë natyrore, bëjnë që trupi i qenit të mos ketë më nevojë për të ruajtur nënqimet mbrojtëse. Ky ngrohtësi e vazhdueshme i bën qentë të ‘besojnë’ se është gjithmonë stinë kalimtare dhe kjo i shtyn të ndërrojnë qime më shpesh, transmeton Telegrafi.
Ndryshimet sezonale dhe raca ndikojnë ndryshe
Normalisht, qimet ndërrohen dy herë në vit: në pranverë (kur bien nënqimet që mbrojnë nga të ftohtit) dhe në vjeshtë (kur rriten përsëri përgatitjet për dimër). Megjithatë, disa raca, sidomos ato me nënqime të dendura, kanë tendencë të lëshojnë qime gjatë gjithë vitit, veçanërisht në ambiente të brendshme.
Si ta ndihmoni qenin dhe shtëpinë tuaj
Natyra u ka dhënë qenve mekanizma për të mbrojtur veten nga kushtet atmosferike, por në kushte shtëpiake, kujdesi i rregullt është thelbësor. Krehja e përditshme (ose javore, në varësi të racës) ndihmon në largimin e qimeve të vdekura dhe stimulon qarkullimin në lëkurë. Shumë qen e shijojnë këtë proces, dhe shumë pronarë vërejnë se qeni afrohet vetë kur sheh furçën në dorë.
Po ashtu, larja periodike dhe mbajtja e higjienës së rregullt do të mbajë jo vetëm qenin më të pastër, por edhe shtëpinë tuaj më të lehtë për t’u pastruar. /Telegrafi/
